ஆஸி. தடுமாற்றம்: பாகிஸ்தான் வரலாற்று வெற்றி..!

ஆஸ்திரேலியாவுக்கு எதிரான 2ஆவது ஒருநாள் போட்டியில் பாகிஸ்தான் அணி 9 விக்கெட்டுகள் வித்தியாசத்தில் வெற்றி பெற்றது.

பாகிஸ்தான் அணி ஆஸி.க்கு சுற்றுப்பயணம் செய்து 3 ஒருநாள், 3 டி20 போட்டிகளில் விளையாடவிருக்கிறது.

இதில் முதல் ஒருநாள் போட்டியில் வென்ற ஆஸி. அணி 2ஆவது போட்டியில் மிகவும் மோசமாக விளையாடி 163 ரன்களுக்கு அனைத்து விக்கெட்டுகளையும் இழந்தது.

அடுத்து விளையாடிய பாகிஸ்தான் 26.3 ஓவரில் 169/1 ரன்கள் எடுத்து வென்றது.

ஆஸி. சார்பில் ஸ்டீவ் ஸ்மித் 35 ரன்கள் எடுத்தார். பாகிஸ்தானின் பேட்டர் சைம் ஆயூப் 86* ரன்கள், அப்துல்லா ஷபிக்கு 64 ரன்கள், பாபர் அசாம் 15* ரன்கள் எடுத்து வெற்றிக்கு வித்திட்டார்கள்.

பாகிஸ்தானின் வேகப் பந்து வீச்சாளர் ஹாரிஸ் ராஃப் ஆட்ட நாயகனாக தேர்வு செய்யப்பட்டார்.

ஒருநாள் போட்டிகளில் 2ஆவது முறையாக 5 விக்கெட்டுகளை எடுத்து அசத்தினார் ஹாரிஷ் ராஃப்.

1-1 என தொடரில் சமநிலையில் இருக்கிறது பாகிஸ்தான் - ஆஸி. 3ஆவது போட்டியில் கம்மின்ஸ் உள்பட மூத்த வீரர்கள் விளையாடமாட்டார்கள் என்பதால் தொடரை வெல்ல பாகிஸ்தானுக்கு நல்லதொரு வாய்ப்பு.

ஆஸ்திரேலியாவை அதன் சொந்த மண்ணில் 9 விக்கெட்டுகள் வித்தியாசத்தில் பாகிஸ்தான் வெற்றி பெறுவது இதுவே முதல் முறையாகும்.