ஆசிய விளையாட்டு: மகளிர் கிரிக்கெட்டில் தங்கம் வென்றது இந்திய அணி!

ஜப்பானில் நடைபெற்று வரும் ஆசிய விளையாட்டுப் போட்டிகளில் மகளிர் கிரிக்கெட்டில் இலங்கையை வீழ்த்தி இந்திய அணி தங்கப்பதக்கத்தை வென்று அசத்தியுள்ளது.

ஜப்பானின் நகோயாவில் நடைபெற்று வரும் ஆசிய விளையாட்டுப் போட்டியின் மகளிருக்கான கிரிக்கெட் இறுதிப்போட்டியில் இந்தியா - இலங்கை அணிகள் மோதின.

நிஷினில் உள்ள கோரோகி விளையாட்டு பூங்காவில் நடைபெற்ற ஆட்டத்தில் டாஸ் வென்ற இந்திய அணியின் கேப்டன் ஹர்மன்ப்ர்த் கௌர் முதலில் பேட்டிங் செய்வதாக அறிவித்தார்.

அதன்படி முதலில் ஆடிய இந்திய அணியின் தொடக்க வீராங்கனைகள் ஸ்மிருதி மந்தனா 79 ரன்களும் (5 பௌண்டரிகள், 7 சிக்ஸர்கள்), ஷஃபாலி வர்மா 48 ரன்களும் (3 பௌண்டரிகள், 3 சிக்ஸர்கள்), விக்கெட் கீப்பர் ரிச்சா கோஷ் 49 ரன்களும் (6 பௌண்டரிகள், 3 சிக்ஸர்கள்), கேப்டன் ஹர்மன்ப்ரீத் கௌர் 19 ரன்களும் எடுத்தனர். இந்திய அணி நிர்ணயிக்கப்பட்ட 20 ஓவர்களில் 3 விக்கெட்டுகள் இழப்புக்கு 216 ரன்கள் குவித்தது.

இலங்கை அணித் தரப்பில் சுகந்திகா குமார், தில்ஹரி, சாமுடி பிரபோதா ஆகியோர் தலா ஒரு விக்கெட்டை வீழ்த்தினர்.

பின்னர், 217 ரன்கள் எடுத்தால் வெற்றி என்ற இமாலய இலக்கை நோக்கி ஆடிய இலங்கை அணி 15.4 ஓவர்களில் அனைத்து விக்கெட்டுகளையும் இழந்து 69 ரன்களுக்கு சுருண்டது. இதனால், இந்திய அணி 147 ரன்கள் வித்தியாசத்தில் இமாலய வெற்றியைப் பதிவு செய்தது.

அதிகபட்சமாக இலங்கை அணி கேப்டன் சமாரி அத்தபட்டு 29 ரன்களும், விக்கெட் கீப்பர் கௌசானி 14 ரன்களும் எடுத்தனர்.

இந்திய அணித் தரப்பில் தீப்தி சர்மா 3 விக்கெட்டுகளும், ஷஃபாலி வர்மா, ஷ்ரேயங்கா பாட்டீல், ஸ்ரீசரணி ஆகியோர் தலா 2 விக்கெட்டுகளும் வீழ்த்தினர்.

ஆசிய விளையாட்டுப் போட்டியின் இறுதியில் வெற்றி பெற்ற இந்திய அணி தங்கப்பதக்கத்தையும், தோல்வியடைந்த இலங்கை அணி வெள்ளிப்பதக்கத்தையும் வென்றன.