சிஎஸ்கேவின் அமர்க்களமான வெற்றியை முன்கூட்டியே கணித்த ஷேன் வாட்சன்

ஐபிஎல் கிரிக்கெட் போட்டியின் 18-ஆவது ஆட்டத்தில் கிங்ஸ் லெவன் பஞ்சாப்பை 10 விக்கெட்டுகள் வித்தியாசத்தில் வீழ்த்தி சென்னை சூப்பா் கிங்ஸ் அபார வெற்றி பெற்றது.

துபையில் ஞாயிற்றுக்கிழமை இரவு நடைபெற்ற ஆட்டத்தில் முதலில் பேட் செய்த பஞ்சாப் 20 ஓவா்களில் 4 விக்கெட் இழப்புக்கு 178 ரன்கள் எடுத்தது. அடுத்து ஆடிய சென்னை 17.4 ஓவா்களில் விக்கெட் இழப்பின்றி 181 ரன்கள் அடித்து வென்றது. ஷேன் வாட்சன் - டு பிளெசிஸ் கூட்டணி அபாரமாக ஆடி அணியின் வெற்றிக்கு வழி வகுத்தது.

முதல் ஆட்டத்தில் கண்ட வெற்றிக்குப் பிறகு தொடா்ந்து 3 தோல்விகளை சந்தித்த சென்னை அணி, இந்த ஆட்டத்தில் வெற்றி கண்டு மீண்டுள்ளது. ஷேன் வாட்சன் ஆட்ட நாயகனாக அறிவிக்கப்பட்டாா். இந்த வெற்றியினால் புள்ளிகள் பட்டியலில் 6-ம் இடத்துக்கு முன்னேறியுள்ளது சிஎஸ்கே அணி.

இந்நிலையில் நேற்றைய ஆட்டத்துக்கு முன்பு மோசமாக விளையாடி வந்த ஷேன் வாட்சன், பஞ்சாப் அணிக்கு எதிரான வெற்றியை முன்கூட்டியே கணித்துள்ளார். ஆட்டத்துக்கு முன்பு ட்விட்டரில் ஷேன் வாட்சன் கூறியதாவது:

சென்னை சூப்பர் கிங்ஸ் அணிக்கான அருமையான ஆட்டம் வரவுள்ளது என்றார். 

வாட்சன் சொன்னது போலவே சிஎஸ்கே அணிக்கு அருமையான வெற்றி கிடைத்தது. இதையடுத்து வாட்சனின் ட்வீட்டைப் பலரும் ரீட்வீட் செய்துள்ளார்கள். நேற்றைய ஆட்டத்தில் வாட்சன் 83 ரன்கள் எடுத்தார்.