மும்பையை எளிதாக வீழ்த்தியது சென்னை!

சென்னை : இன்றைய ஐபிஎல் ஆட்டத்தில் மும்பை இந்தியன்ஸ் அணியை எளிதாக வீழ்த்தி சென்னை சூப்பர் கிங்ஸ் வெற்றி பெற்றது.

சென்னை சேப்பாக்கம் திடலில் நடைபெற்ற 44-ஆவது லீக் சுற்று ஆட்டத்தில் சென்னை சூப்பர் கிங்ஸ் மற்றும் மும்பை இந்தியன்ஸ் அணிகள் விளையாடின. டாஸ் வென்ற மும்பை இந்தியன்ஸ் அணி பேட்டிங்கைத் தேர்வு செய்து நிர்ணயிக்கப்பட்ட 20 ஓவர்களின் முடிவில் 7 விக்கெட்டுகளை இழந்து 159 ரன்கள் எடுத்தது.

அடுத்து களமிறங்கிய சென்னை சூப்பர் கிங்ஸ், மும்பை இந்தியன்ஸ் நிர்ணயித்த 160 ரன்கள் இலக்கை, 18.1 ஓவர்களில் 2 விக்கெட்களை மட்டுமே இழந்து வெற்றியை ருசித்தது.

சென்னை அணியில் கேப்டன் ருதுராஜ் கெய்க்வாட் சிறப்பாக விளையாடி அரைசதம் கடந்தார். அவர் 48 பந்துகளில் 2 சிக்ஸர்கள், 5 பௌண்டரிகளுடன் 67 ரன்கள் குவித்தார். அவருக்குப் பக்கபலமாக கார்த்திக் சர்மா 40 பந்துகளில் 3 சிக்ஸர்கள், 4 பௌண்டரிகளுடன் 54 ரன்கள் திரட்டி அணியின் வெற்றியை உறுதி செய்தார்.

இந்த சீசனில் இதுவரை 9 ஆட்டங்களில் விளையாடிய சென்னை அணிக்கு இது 4-ஆவது வெற்றியாகும். மொத்தம் 8 புள்ளிகளுடன் புள்ளிப்பட்டியலில் 6-ஆவது இடத்துக்கு முன்னேறியுள்ளது சென்னை சூப்பர் கிங்ஸ்.

இன்னொருபுறம், இந்த சீசனில் மோசமான ஆட்டத்திறனை வெளிப்படுத்தும் மும்பை அணி, 9 ஆட்டங்களில் 7-ஆவது தோல்வியை பதிவு செய்தது. அந்த அணி புள்ளிப்பட்டியலில் 4 புள்ளிகளுடன் 9-ஆவது இடத்தில் தள்ளாடுகிறது.

ஏற்கெனவே சென்னை அணிக்கெதிரான கடந்த ஆட்டத்திலும் மும்பை அணி படுதோல்வியடைந்திருந்தது குறிப்பிடத்தக்கது.