50-வது டெஸ்ட்: லில்லீயின் நீண்டநாள் சாதனையை முறியடிக்கவுள்ள அஸ்வின்!

இந்திய கிரிக்கெட் அணியின் முன்னணி சுழற்பந்து வீச்சாளரான அஸ்வின் தனது 50-ஆவது டெஸ்ட் கிரிக்கெட் போட்டியில் தற்போது பங்கேற்றுள்ளார்.

காலேவில் இன்று தொடங்கியுள்ள இலங்கைக்கு எதிரான டெஸ்ட், அஸ்வினின் 50 டெஸ்ட் போட்டியாகும்.

இதுவரை 49 டெஸ்ட் போட்டிகளில் விளையாடியுள்ள அஸ்வின் 275 விக்கெட்டுகளை வீழ்த்தியுள்ளார். ஒரு போட்டியில் 7 முறை 10 விக்கெட்டுகளையும், ஓர் இன்னிங்ஸில் 25 முறை 5 விக்கெட்டுகளையும் வீழ்த்தியிருக்கிறார் அஸ்வின்.

இந்த டெஸ்டின் முடிவில் அஸ்வின் லில்லீயின் நீண்டநாள் சாதனை ஒன்றை முறியடித்து முதலிடம் பிடிப்பார்.

50-வது டெஸ்டின் முடிவில் அதிக விக்கெட்டுகள் எடுத்த வீரர்களின் பட்டியலில், டென்னிஸ் லில்லீ முதலிடத்தில் உள்ளார். அவர் 262 விக்கெட்டுகள் எடுத்ததுதான் இன்றுவரை சாதனையாக உள்ளது. ஆனால் அஸ்வின் 49-வது டெஸ்ட் போட்டியின் முடிவிலேயே 275 விக்கெட்டுகளை வீழ்த்தியுள்ளார். எனவே காலே டெஸ்டின் முடிவில் லில்லீயின் சாதனையை அஸ்வின் முறியடித்து முதலிடம் பிடிப்பார்.

50 டெஸ்டுகளுக்குப் பிறகு

262 லில்லீ

260 ஸ்டெயின் 

251 டொனால்ட் 

245 முரளிதரன் 

244 வக்கார் யூனுஸ் 

239 மால்கம் மார்ஷல் 

அஸ்வின் - 49 டெஸ்டுகளுக்குப் பிறகு - 275 விக்கெட்டுகள்.

அதேபோல அதிவேக 300 டெஸ்டுகள் என்கிற சாதனையையும் அஸ்வின் விரைவில் நிகழ்த்த வாய்ப்புண்டு. 56 டெஸ்டுகளில் 300 டெஸ்ட் விக்கெட்டுகள் எடுத்து இப்பட்டியலில் லில்லீ முதலிடத்தில் உள்ளார். இதை முறியடிக்க அடுத்த 6 டெஸ்டுகளில் 25 விக்கெட்டுகள் எடுத்தால் போதும், மீண்டுமொருமுறை லில்லீயின் சாதனையை அஸ்வின் முறியடித்துவிடுவார்.