ஆஸ்திரேலிய ஓபன்: காலிறுதியில் ஸ்ரீகாந்த் - சாய் பிரணீத் மோதல்!

ஆஸ்திரேலிய ஓபன் சூப்பர் சீரிஸ் பாட்மிண்டன் போட்டியில் இந்தியாவின் ஸ்ரீகாந்த், சாய் பிரணீத் ஆகியோர் காலிறுதிச் சுற்றுக்கு முன்னேறியுள்ளார்கள். 

ஆஸ்திரேலியாவின் சிட்னி நகரில் நடைபெற்று வரும் இந்தப் போட்டியில் ஆடவர் ஒற்றையர் இரண்டாவது சுற்றில் ஸ்ரீகாந்த் 15-21, 21-13, 21-13 என்ற செட் கணக்கில் உலகின் நெ.1 வீரரான தென் கொரியாவின் சன் வான் ஹோவை வீழ்த்தினார். சமீபத்தில் நடைபெற்ற இந்தோனேசிய ஓபன் சூப்பர் சீரிஸ் பாட்மிண்டன் போட்டியில் இந்தியாவின் ஸ்ரீகாந்த் சாம்பியன் பட்டம் வென்றார். சூப்பர் சீரிஸ் போட்டியில் ஸ்ரீகாந்த் வென்ற 3-வது பட்டம் இது.

மற்றொரு ஆட்டத்தில் இந்தியாவின் சாய் பிரணீத் 21-15, 18-21, 21-13 என்ற செட் கணக்கில் சீனாவின் ஹுயாங் யூக்ஸியாங்கை வீழ்த்தினார். 

காலிறுதியில் ஸ்ரீகாந்த் - சாய் பிரணீத் ஆகிய இருவரும் மோதவுள்ளார்கள். இருவரும் இதுவரை 6 முறை மோதியுள்ளார்கள். அதில் சாய் பிரணீத் 5-1 என்கிற கணக்கில் முன்னிலை பெற்றுள்ளதால் இந்தியர்கள் இருவரும் மோதும் காலிறுதிப் போட்டி சுவாரசியமாக இருக்கும் என எதிர்பார்க்கப்படுகிறது.