மகளிர் உலகக் கோப்பை கிரிக்கெட்: இந்தியா வெற்றி

மகளிர் உலகக் கோப்பை கிரிக்கெட் போட்டியின் 7-ஆவது ஆட்டத்தில் மேற்கிந்தியத் தீவுகளை எதிர்கொண்ட இந்திய அணி 7 விக்கெட்டுகள் வித்தியாசத்தில் வெற்றி பெற்றது.
இங்கிலாந்தின் டெளன்டன் நகரில் வியாழக்கிழமை நடைபெற்ற இந்த ஆட்டத்தில் முதலில் பேட் செய்த மேற்கிந்தியத் தீவுகள் 50 ஓவர்களில் 8 விக்கெட் இழப்புக்கு 183 ரன்கள் எடுத்தது. அடுத்து ஆடிய இந்தியா 42.3 ஓவர்களில் 3 விக்கெட் இழப்புக்கு 186 ரன்கள் எடுத்து வென்றது. முன்னதாக, டாஸ் வென்ற இந்திய அணி பந்துவீச தீர்மானித்தது. இதையடுத்து பேட் செய்த மேற்கிந்தியத் தீவுகள் அணியில் தொடக்க வீராங்கனை ஹெய்லேய் மேத்தியூஸ் அதிகபட்சமாக 57 பந்துகளில் 7 பவுண்டரிகளுடன் 43 ரன்கள் எடுத்து ஆட்டமிழந்தார்.
தொடர்ந்து வந்த கேப்டன் ஸ்டெஃபானி டெய்லர் 16, சேடின் நேஷன் 12, ஷானெல் டாலே 33 ரன்களில் வீழ்ந்தனர். ஃபெலிசியா வால்டர்ஸ், டீன்ட்ரா டாட்டின், மெரிஸா ஆகில்லெய்ரா, கைஷோனா நைட் ஆகியோர் ஒற்றை இலக்கத்தில் ஆட்டமிழந்தனர். இவ்வாறாக மேற்கிந்தியத் தீவுகள் 50 ஓவர்களில் 8 விக்கெட் இழப்புக்கு 183 ரன்கள் எடுத்தது. ஏஃபி ஃப்ளெட்சர் 36, அனிஷா முகமது 11 ரன்களுடன் ஆட்டமிழக்காமல் இருந்தனர். இந்தியத் தரப்பில் ஹர்மன் பிரீத் கெளர், பூனம் யாதவ், தீப்தி சர்மா தலா 2 விக்கெட்டுகள் வீழ்த்தினர். எக்தா பீஷித் ஒரு விக்கெட் எடுத்தார்.
இந்தியா: அடுத்து ஆடிய இந்திய அணியில் தொடக்க வீராங்கனை பூனம் ராவத் டக் அவுட் ஆக, அடுத்து வந்த தீப்தி சர்மா 6 ரன்களில் ஆட்டமிழந்தார். தொடக்க வீராங்கனையுடன் வந்த ஸ்மிருதி மந்தனா அபாரமாக ஆடி சதமடித்தார். இந்நிலையில் கேப்டன் மிதாலி ராஜ் 46 ரன்களில் ஆட்டமிந்தார். ஸ்மிருதி மந்தனா, மோனா மேஷ்ராம் ஆகியோர் அணியை வெற்றிக்கு வழிநடத்தினர். 42.3 ஓவர்களில் 3 விக்கெட் இழப்புக்கு 186 ரன்கள் எடுத்து வென்றது இந்தியா. ஸ்மிருதி மந்தனா 108 பந்துகளுக்கு 13 பவுண்டரிகள், 2 சிக்ஸர்கள் என 106 ரன்களுடனும், மோனா 18 ரன்களுடனும் ஆட்டமிழக்காமல் இருந்தனர். ஸ்மிருதி மந்தனா ஆட்டநாயகியாக அறிவிக்கப்பட்டார்.
ஆஸ்திரேலியா வெற்றி: இதனிடையே, வியாழக்கிழமை நடைபெற்ற மற்றொரு ஆட்டத்தில் இலங்கை மகளிர் அணியை எதிர்கொண்ட ஆஸ்திரேலிய மகளிர் அணி, 8 விக்கெட்டுகள் வித்தியாசத்தில் வெற்றி பெற்றது.