பிசிசிஐ பரிந்துரை: ராஜீவ் காந்தி கேல் ரத்னா விருதுக்கு கோலி; துரோணாச்சார்யா விருதுக்கு ராகுல் டிராவிட்!

2018-ம் ஆண்டுக்கான ராஜீவ் காந்தி கேல் ரத்னா, துரோணாச்சார்யா, அர்ஜுனா, தயான்சந்த் விருதுகளுக்கான பரிந்துரைகள் குறித்து முக்கிய முடிவுகளை எடுத்துள்ளது பிசிசிஐ. 

இந்திய விளையாட்டுத் துறையின் மிக உயரிய விருதான ராஜீவ்காந்தி கேல் ரத்னா விருதுக்கு கோலியின் பெயர் பரிந்துரை செய்யப்பட்டுள்ளது. கோலி இரண்டாவது முறையாக இந்த விருதுக்குப் பரிந்துரை செய்யப்பட்டுள்ளார். இதற்கு முன்பு 2016-ல் கோலியைப் பரிந்துரை செய்தது பிசிசிஐ. 

சிறந்த பயிற்சியாளர்களுக்கான துரோணாச்சார்யா விருதுக்கு ராகுல் டிராவிடின் பெயரைப் பரிந்துரை செய்துள்ளது. சமீபத்திய யு-19 உலகக்கோப்பையை வென்ற இந்திய அணியின் பயிற்சியாளராக டிராவிட் செயல்பட்டதால் அவரை இந்த விருதுக்குப் பரிந்துரை செய்துள்ளது. 

விளையாட்டுத் துறையில் வாழ்நாள் சாதனை புரிந்தோருக்கான தயான்சந்த் விருதுக்கு கவாஸ்கர் பெயர் பரிந்துரை செய்யப்பட்டுள்ளது.  

கிரிக்கெட் வீரர் ஷிகர் தவன், வீராங்கனை ஸ்மிருதி மந்தானா ஆகியோர் பெயர்களை அர்ஜுனா விருதுக்கு பிசிசிஐ பரிந்துரைத்துள்ளது.