லார்ட்ஸ் டெஸ்ட்: மழையால் முதல் நாள் ஆட்டம் டாஸ் போடாத நிலையில் ரத்து 

இங்கிலாந்து, இந்தியா அணிகளுக்கு இடையிலான லார்ட்ஸ் டெஸ்ட் போட்டியின் முதல் நாள் ஆட்டம் மழை காரணமாக டாஸ் கூட போடாத நிலையில் ரத்து செய்யப்பட்டது. 

இங்கிலாந்துடன் 5 போட்டிகள் கொண்ட டெஸ்ட் தொடரில் இந்திய அணி விளையாடுகிறது. இதன் முதல் டெஸ்டில் இங்கிலாந்து அணி இந்தியாவை வீழ்த்தியது. இதையடுத்து, இரு அணிகளுக்கு இடையிலான 2-ஆவது டெஸ்ட் போட்டி லார்ட்ஸ் மைதானத்தில் வியாழக்கிழமை தொடங்கியது. 

லார்ட்ஸ் மைதானத்தில் பெய்த கனமழையால் டாஸ் போடுவதில் முதலில் தாமதம் ஏற்பட்டது. மழை விடாது பெய்ததால் டாஸ் கூட போடாத நிலையில் உணவு இடைவேளை எடுக்கப்பட்டது. இருப்பினும் மழை விடாது தொடர்ந்து பெய்து கொண்டே இருந்தது. அதனால், தேநீர் இடைவேளையும் எடுக்கப்பட்டது. 

தேநீர் இடைவேளை முடிந்த பிறகும் மழை விட்டபாடில்லை. அதனால், முதல் நாள் ஆட்டத்தை கைவிடப்படுவதாக போட்டி நடுவர்கள் அறிவித்தனர். லார்ட்ஸ் டெஸ்டின் முதல் நாள் ஆட்டம் கைவிட்டபோதிலும் மீதமுள்ள 4 நாள் ஆட்டங்கள் உள்ளூர் நேரப்படி காலை 10.30 மணிக்கு திட்டமிட்டபடி தொடங்கும். அதேசமயம் உள்ளூர் நேரப்படி மாலை 7 மணி வரை விளையாட்டை நீட்டித்துக்கொள்ளலாம்.

லார்ட்ஸ் மைதான வானிலைப்படி மீதமுள்ள 4 நாட்கள் அங்கு மழை இடையூறு இருக்காது என்று எதிர்பார்க்கப்படுகிறது.