பாகிஸ்தான் பேட்டிங் பயிற்சியாளராக முன்னாள் வீரர் நியமனம்

பாகிஸ்தான் பேட்டிங் பயிற்சியாளராக முன்னாள் வீரர் யூனிஸ் கான் நியமிக்கப்பட்டுள்ளார்.

டிசம்பர் - ஜனவரியில் நியூசிலாந்துக்குச் சுற்றுப்பயணம் செய்து 3 டி20, 2 டெஸ்டுகளில் பாகிஸ்தான் அணி விளையாடவுள்ளது. 

இந்தச் சுற்றுப்பயணத்துக்கான 35 பேர் கொண்ட பாகிஸ்தான் அணி அறிவிக்கப்பட்டுள்ளது. டெஸ்ட் கேப்டனாக இருந்த அஸார் அலிக்குப் பதிலாக ஒருநாள், டி20 அணிகளின் கேப்டனாக உள்ள பாபர் அஸாம், பாகிஸ்தான் டெஸ்ட் அணியின் கேப்டனாகவும் நியமிக்கப்பட்டுள்ளார். இதன்மூலம் 26 வயது பாபர் அஸாம், மூன்று வகை கிரிக்கெட் அணிகளின் கேப்டனாகவும் உள்ளார். 

இந்நிலையில் பாகிஸ்தான் அணியின் பேட்டிங் பயிற்சியாளராக முன்னாள் வீரர் யூனிஸ் கான் நியமிக்கப்பட்டுள்ளார். 2022 டி20 உலகக்கோப்பை வரை இப்பணியில் நீடிப்பார் என்று அறிவிக்கப்பட்டுள்ளது.

2017-ல் ஓய்வு பெற்ற 42 வயது யூனிஸ் கான், 118 டெஸ்டுகள், 265 ஒருநாள், 25 டி20 ஆட்டங்களில் விளையாடியுள்ளார். சமீபத்தில் இங்கிலாந்துச் சுற்றுப்பயணத்துக்கான பாகிஸ்தான் அணியின் பேட்டிங் பயிற்சியாளராக யூனிஸ் கான் நியமிக்கப்பட்டார். இதையடுத்து மீண்டும் அவருக்கு இந்தப் பொறுப்பு வழங்கப்பட்டுள்ளது.

நியூசிலாந்துச் சுற்றுப்பயணத்துக்காக நவம்பர் 23 அன்று புறப்படுகிறது பாகிஸ்தான் அணி.