3-வது டெஸ்டில் இந்திய அணியில் மாற்றம் இருக்குமா?: விராட் கோலி பதில்

வெற்றிக் கூட்டணியை மாற்ற யாரும் விரும்பமாட்டார்கள் என இந்திய கேப்டன் விராட் கோலி கூறியுள்ளார்.

இந்தியா - இங்கிலாந்து அணிகளுக்கு இடையிலான முதல் டெஸ்ட் டிராவில் முடிவடைந்தது. லார்ட்ஸ் மைதானத்தில் நடைபெற்ற 2-வது டெஸ்டில் இந்தியா வெற்றி பெற்று தொடரில் 1-0 என முன்னிலை பெற்றுள்ளது. மூன்றாவது டெஸ்ட் லீட்ஸில் நாளை தொடங்குகிறது. 

முதல் டெஸ்டில் விளையாடியபோது காயமடைந்த ஷர்துல் தாக்குர், 2-வது டெஸ்டிலிருந்து விலகினார். நான்கு வேகப்பந்து வீச்சாளர் + ஒரு சுழற்பந்து வீச்சாளர் என்கிற கூட்டணியே இந்தத் தொடரில் தொடரும் என முதல் டெஸ்டின் முடிவில் விராட் கோலி தகவல் தெரிவித்தார். இதனால் 2-வது டெஸ்டில் ஷர்துல் தாக்குருக்குப் பதிலாக இஷாந்த் சர்மா இடம்பெற்று சிறப்பாகப் பந்துவீசினார். 

காயத்திலிருந்து குணமான ஷர்துல் தாக்குர், 3-வது டெஸ்டில் விளையாடுவதற்கான உடற்தகுதியை அடைந்துள்ளார். ஷர்துல் தாக்குரை அணியில் சேர்த்தால் அவருடைய பேட்டிங் திறமை உதவியாக இருக்கும் என கோலி கருதினார். அதனால் தான் முதல் டெஸ்டில் தாக்குர் இடம்பெற்றார். எனினும் 2-வது டெஸ்டில் இஷாந்த் சர்மா சிறப்பாகப் பந்துவீசியதால் 3-வது டெஸ்டில் இருவரில் யார் இடம்பெறுவார் என்கிற கேள்வி எழுந்தது. இதற்கு விராட் கோலி பதில் அளித்துள்ளார்.

செய்தியாளர் சந்திப்பில் அவர் கூறியதாவது:

காயம் எதுவும் இருந்தால் தவிர, அணியில் மாற்றம் செய்ய எந்தக் காரணமும் எங்களிடம் இல்லை. இதுவரை யாருக்கும் காயம் ஏற்படவில்லை. வெற்றிக் கூட்டணியை மாற்ற யாரும் விரும்பமாட்டோம். 2-வது டெஸ்டுக்குப் பிறகு களத்தில் இறங்க அனைவரும் ஆர்வமாக உள்ளார்கள். அணியில் 12 பேரைத் தேர்வு செய்து ஆடுகளத்தின் தன்மை, வானிலை ஆகியவற்றை முன்வைத்து 11 வீரர்களைத் தேர்வு செய்வோம் என்று கூறியுள்ளார்.