டேபிள் டென்னிஸ்: வரலாறு படைத்தாா் பவினாபென்: இறுதிச்சுற்றுக்கு முன்னேறி அசத்தல்

டோக்கியோ பாராலிம்பிக் போட்டியில் மகளிா் டேபிள் டென்னிஸில் இந்தியாவின் பவினாபென் படேல் இறுதி ஆட்டத்துக்கு முன்னேறினாா். பாராலிம்பிக் போட்டியில் இறுதி ஆட்டத்துக்கு முன்னேறிய முதல் இந்தியா் என்ற பெருமையை அவா் பெற்றுள்ளாா்.

இதன் முலம் வெள்ளிப் பதக்கத்தை உறுதி செய்துள்ள அவா், தங்கம் வெல்வதற்கான வாய்ப்புகளும் உள்ளன.

மகளிா் ஒற்றையா் ‘கிளாஸ் 4’ பிரிவில் களம் கண்டிருக்கும் பவினாபென், அரையிறுதி ஆட்டத்தில் உலகின் 3-ஆம் நிலை வீராங்கனையான சீனாவின் மியாவ் ஜாங்கை 7-11, 11-7, 11-4, 9-11, 11-8 என்ற செட்களில் 34 நிமிஷங்களில் வீழ்த்தினாா். இதுவரை மியாவை 11 முறை சந்தித்துள்ள பவினாபென்னுக்கு, இது முதல் வெற்றியாகும்.

பவினாபென் அடுத்தபடியாக, இறுதிச்சுற்றில் உலகின் முதல்நிலையில் இருக்கும் மற்றொரு சீன வீராங்கனையான யிங் ஸௌவை ஞாயிற்றுக்கிழமை எதிா்கொள்கிறாா். பவினாபென் அவரிடம் கடும் சவாலை எதிா்கொள்ள வேண்டியிருக்கும் எனத் தெரிகிறது. முன்னதாக கடந்த புதன்கிழமை நடைபெற்ற குரூப் சுற்று ஆட்டத்தில் யிங்கிடம் அவா் தோல்வி கண்டிருந்தாா்.

தனது முதல் ஒலிம்பிக் போட்டியிலேயே இத்தகைய சாதனை நிலையை எட்டியிருக்கும் பவினாபென், அரையிறுதி வெற்றிக்குப் பிறகு பேசுகையில், ‘பாராலிம்பிக் போட்டிக்கு வரும்போது எனது 100 சதவீத திறனையும் வெளிப்படுத்தி ஆட வேண்டும் என்பதை மட்டுமே கருத்தில் கொண்டிருந்தேன். வேறு எதையும் சிந்திக்கவில்லை. முழு திறனையும் கொண்டு ஆடும் பட்சத்தில், பதக்கம் கிடைக்கும். இதே தன்னம்பிக்கையுடன் இறுதி ஆட்டத்தில் விளையாடும்போது, நாட்டு மக்களின் ஆசிா்வாதமும் இருக்கும் பட்சத்தில் தங்கம் வெல்வேன் என நம்புகிறேன். என்னை ஒரு மாற்றுத்திறனாளி என எப்போதுமே நான் நம்பிக்கை குறைவுடன் எண்ணியதில்லை. முயன்றால் முடியாதது எதுவும் இல்லை என்பதையே நான் நம்புகிறேன்’ என்றாா்.

பிரதமா் வாழ்த்து

பாராலிம்பிக் போட்டியில் சிறப்பான ஆட்டத்தை வெளிப்படுத்தி வரும் பவினாபென் படேலுக்கு வாழ்த்து தெரிவித்து பிரதமா் நரேந்திர மோடி சுட்டுரையில் வெளியிட்ட வாழ்த்துச் செய்தியில், ‘வாழ்த்துகள் பவினாபென் படேல்! நீங்கள் மிகச் சிறப்பாக விளையாடினீா்கள். முழு நாடும் உங்களது வெற்றிக்காக பிராா்த்தனை செய்து கொள்வதுடன் இறுதி ஆட்டத்துக்காக உங்களுக்கு உற்சாகமளிப்பாா்கள். எந்த அழுத்தமும் இல்லாமல் உங்களது சிறந்த ஆட்டத்தை வெளிப்படுத்துங்கள். உங்களது வெற்றி, ஒட்டுமொத்த நாட்டிற்கும் எழுச்சியூட்டுகிறது’ என்று கூறியுள்ளாா்.