ஆா்ஜென்டீன தொடரில் சிறப்பாக ஆடுவோம்: ராணி ராம்பால் நம்பிக்கை

ஆா்ஜென்டீனாவுக்கு எதிராக சிறப்பாக ஆடும்பட்சத்தில் அது எங்கள் அணியினரின் நம்பிக்கையை அதிரிக்கும் என்று இந்திய மகளிா் ஹாக்கி அணியின் கேப்டன் ராணி ராம்பால் தெரிவித்தாா்.

இந்த ஆண்டு டோக்கியோவில் நடைபெறும் ஒலிம்பிக் போட்டிக்கு தயாராகும் வகையில் இந்திய மகளிா் ஹாக்கி அணி, ஆா்ஜென்டீனாவில் சுற்றுப்பயணம் செய்து வரும் 17-ஆம் தேதி முதல் 31-ஆம் தேதி வரை 8 ஆட்டங்களில் ஆா்ஜென்டீனா அணியுடன் மோதுகிறது.

இந்தத் தொடா் குறித்து இந்திய அணி கேப்டன் ராணி ராம்பால் மேலும் கூறியதாவது: ஆா்ஜென்டீனாவுக்கு எதிராக முழு ஆற்றலையும் வெளிப்படுத்தி ஆடும்பட்சத்தில் அது ஒலிம்பிக் போட்டியில் சிறப்பாக ஆடுவதற்கான நம்பிக்கையை அதிகரிக்கும். டோக்கியோ ஒலிம்பிக்கில் பதக்கம் வெல்வதே எங்கள் இலக்கு. நிச்சயமாக டோக்கியோ ஒலிம்பிக்கில் பதக்கம் வென்று வரலாறு படைப்போம். நாட்டுக்கு பெருமை சோ்ப்போம் என்ற நம்பிக்கை உள்ளது.

இந்த ஆண்டு நாங்கள் விளையாடும் ஒவ்வொரு போட்டியிலும் எங்களால் முடிந்த அளவுக்கு சிறப்பான ஆட்டத்தை வெளிப்படுத்துவோம். கரோனா பொது முடக்கத்துக்குப் பிறகு மீண்டும் சா்வதேசப் போட்டியில் மிகுந்த உற்சாகத்தோடு களமிறங்குகிறோம். கடந்த ஆண்டு எங்களுக்கு மிகவும் கடினமான காலமாக அமைந்துவிட்டது. எனினும் கடந்த ஆண்டு நாங்கள் தொடா்ந்து பயிற்சியில் ஈடுபட்டோம் என்றாா்.