டி20 உலகக் கோப்பை: இன்றிரவு அறிவிக்கப்படும் இந்திய அணி

டி20 உலகக் கோப்பைப் போட்டிக்கான இந்திய அணி இன்றிரவு அறிவிக்கப்படும் எனத் தகவல்கள் வெளியாகியுள்ளன. 

டி20 உலகக் கோப்பை - ஐக்கிய அரபு அமீரகம் மற்றும் ஓமனில் அக்டோபர் 17 முதல் நவம்பர் 14 வரை நடைபெறுகிறது. துபை, அபு தாபி, ஷார்ஜா, ஓமன் என நான்கு பகுதிகளில் டி20 உலகக் கோப்பை நடைபெறவுள்ளது. இந்தியாவில் நடத்தப்படவிருந்த டி20 உலகக் கோப்பை போட்டி, கரோனா சூழல் காரணமாக ஐக்கிய அரபு அமீரகத்துக்கு மாற்றப்பட்டுள்ளது.

டி20 உலகக் கோப்பைக்கான அணிகளைப் பல்வேறு நாடுகளும் அறிவித்து வருகின்றன. இந்நிலையில் டி20 உலகக் கோப்பைப் போட்டிக்கான இந்திய அணி இன்றிரவு 9 மணிக்கு அறிவிக்கப்படவுள்ளதாகத் தகவல்கள் வெளியாகியுள்ளன. 15 வீரர்களுடன் 5 மாற்று வீரர்களும் தேர்வாகவுள்ளார்கள். இந்திய அணியில் தமிழக வீரர்களான நடராஜனும் வாஷிங்டன் சுந்தரும் தேர்வாக அதிக வாய்ப்புகள் உள்ளன.