விபத்தில் காயமடைந்த ஷேன் வார்னே

ஆஸி. அணியின் முன்னாள் வீரர் ஷேன் வார்னே, விபத்தில் காயமடைந்துள்ளார்.

ஆஸ்திரேலிய அணிக்காக 145 டெஸ்டுகளில் விளையாடிய 708 விக்கெட்டுகளை வீழ்த்தியுள்ளார் ஷேன் வார்னே. 

இந்நிலையில் நேற்று இருசக்கர வாகனத்தில் சென்றபோது ஏற்பட்ட விபத்தில் தனக்குக் காயம் ஏற்பட்டுள்ளதாக 52 வயது ஷேன் வார்னே ஒரு பேட்டியில் கூறியுள்ளார். தன் மகன் ஜாக்சனுடன் இரு சக்கர வாகனத்தில் நேற்று சென்றபோது, வாகனத்திலிருந்து கீழே விழுந்து 15 மீட்டர் தூரத்துக்குச் சறுக்கிச் சென்றதாகவும் அவர் தகவல் தெரிவித்துள்ளார். காயத்தினால் வலி அதிகமாக ஏற்பட்டதால் முன்னெச்சரிக்கை நடவடிக்கையாக மருத்துவமனைக்குச் சென்று அவர் சிகிச்சை  எடுத்துக்கொண்டார். 

ஷேன் வார்னே, காயத்திலிருந்து விரைவில் மீண்டு வந்து ஆஷஸ் டெஸ்ட் தொடரில் ஃபாக்ஸ் ஸ்போர்ட்ஸ் வர்ணனையாளராகப் பணியாற்றுவார் என எதிர்பார்க்கப்படுகிறது.