இறுதிச்சுற்றில் இந்திய அணியுடன் மோத விருப்பம்: மேத்யூ ஹேடன்

டி20 உலகக் கோப்பை இறுதிச்சுற்றில் இந்தியாவுடன் மோத விரும்புவதாக பாகிஸ்தான் அணியின் ஆலோசகர் மேத்யூ ஹேடன் கூறியுள்ளார்.

டி20 உலகக் கோப்பைப் போட்டியின் அரையிறுதி ஆட்டத்தில் நியூசிலாந்தை 7 விக்கெட் வித்தியாசத்தில் வீழ்த்தி இறுதிச்சுற்றுக்கு முன்னேறியுள்ளது பாகிஸ்தான் அணி.

சிட்னியில் நடைபெற்ற முதல் அரையிறுதியில் நியூசிலாந்து - பாகிஸ்தான் அணிகள் மோதின. டாஸ் வென்று பேட்டிங்கைத் தேர்வு செய்தது நியூசிலாந்து அணி. 

நியூசிலாந்து அணி 20 ஓவர்களில் 4 விக்கெட் இழப்புக்கு 152 ரன்கள் எடுத்தது. 46 ரன்களுக்கு ஆட்டமிழந்தார் வில்லியம்சன். மிட்செல் 53, நீஷம் 16 ரன்களுடன் ஆட்டமிழக்காமல் இருந்தார்கள். கடைசி 5 ஓவர்களில் 46 ரன்கள் எடுத்தது நியூசிலாந்து. ஷாஹீன் அப்ரிடி 2 விக்கெட்டுகளை வீழ்த்தினார். இந்த உலகக் கோப்பைப் போட்டியில் விமர்சனத்துக்கு ஆளான பாபர் ஆஸம் - ரிஸ்வான் ஜோடி இன்று அபாரமாக விளையாடியது. 12 ஓவர்கள் வரை நியூசிலாந்தால் பாபர் - ரிஸ்வான் ஜோடியைப் பிரிக்க முடியவில்லை. 42 பந்துகளில் 53 ரன்கள் எடுத்து போல்ட் பந்தில் ஆட்டமிழந்தார் பாபர். அப்போது ஸ்கோர் 105. ரிஸ்வான் 43 பந்துகளில் 57 ரன்கள் எடுத்து 17-வது ஓவரின் முடிவில் ஆட்டமிழந்தார். பாகிஸ்தான் அணி 19.1 ஓவர்களில் 3 விக்கெட் இழப்புக்கு 153 ரன்கள் எடுத்து அரையிறுதியில் நியூசிலாந்தை வீழ்த்தி இறுதிச்சுற்றுக்கு முன்னேறியது. நாளை நடைபெறும் 2-வது அரையிறுதியில் இந்தியா - இங்கிலாந்து அணிகள் மோதவுள்ளன. 

இந்நிலையில் வெற்றிக்குப் பிறகு பாகிஸ்தான் அணியின் ஆலோசகரும் ஆஸி. முன்னாள் வீரருமான மேத்யூ ஹேடன் கூறியதாவது:

இந்த நாள் மிகவும் சிறப்பானது. சில விஷயங்கள் அற்புதமாக அமைந்தன. எல்லோரும் பாபர் - ரிஸ்வான் பற்றி பேசுவார்கள். எங்களுடைய பந்துவீச்சு இன்று அபாரமாக இருந்தது. ரிவர்ஸ் ஸ்விங் பந்தை வீச முடிந்ததால் ஷாஹீன் அப்ரிடியை எதிர்கொள்வது கடினமாகி விட்டது. இறுதிச்சுற்றில் இந்தியாவுடன் மோத விரும்புகிறோம். ஏனெனில் அப்போது அது அமர்க்களமான ஆட்டமாக அமையும் என்றார்.