நியூசிலாந்துக்கு எதிரான முதல் டெஸ்டை 8 விக்கெட் வித்தியாசத்தில் வென்று வரலாற்று வெற்றியை அடைந்துள்ளது வங்கதேச அணி.
வங்கதேச அணி நியூசிலாந்துக்குச் சுற்றுப்பயணம் செய்து இரு டெஸ்டுகளில் விளையாடுகிறது.
முதல் டெஸ்டில் முதலில் பேட்டிங் செய்த நியூசிலாந்து அணி 328 ரன்கள் எடுத்தது. வங்கதேச அணி முதல் இன்னிங்ஸில் 176.2 ஓவர்களில் 458 ரன்களுக்கு அனைத்து விக்கெட்டுகளையும் இழந்தது. இதனால் முதல் இன்னிங்ஸில் 130 ரன்கள் முன்னிலை பெற்றது. வங்கதேச அணியில் மஹ்முதுல் ஹசன் ஜாய் 78 ரன்கள், ஷாண்டோ 64 ரன்கள், கேப்டன் மோமினுல் ஹஹ் 88 ரன்கள், விக்கெட் கீப்பர் லிடன் தாஸ் 86 ரன்கள் எடுத்தார்கள். நியூசி. தரப்பில் டிரெண்ட் போல்ட் 4 விக்கெட்டுகளும் நீல் வாக்னர் 3 விக்கெட்டுகளும் எடுத்தார்கள்.
இதன்பிறகு விளையாடிய நியூசிலாந்து அணி 4-ம் நாள் முடிவில் 63 ஓவர்களில் 5 விக்கெட் இழப்புக்கு 147 ரன்கள் எடுத்துத் தடுமாறியது. டெய்லர் 37, ரச்சின் ரவீந்திரா 6 ரன்களுடன் களத்தில் இருந்தார்கள். 5 விக்கெட்டுகள் மீதமுள்ள நிலையில் நியூசிலாந்து அணி 2-வது இன்னிங்ஸில் 17 ரன்கள் முன்னிலை பெற்றிருந்தது.
இந்நிலையில் 5-ம் நாளான இன்று நியூசிலாந்து அணி முதல் இன்னிங்ஸில் 73.4 ஓவர்களில் 169 ரன்களுக்கு ஆட்டமிழந்தது. டெய்லர் 40 ரன்களிலும் ரச்சின் ரவிந்திரா 16 ரன்களிலும் ஆட்டமிழந்தார்கள். எபடாட் 6 விக்கெட்டுகளும் டஸ்கின் 3 விக்கெட்டுகளும் எடுத்தார்கள்.
முதல் டெஸ்டில் வங்கதேச அணி வெற்றி பெற 40 ரன்கள் இலக்கு அளிக்கப்பட்டது. வங்கதேச அணி, 16.5 ஓவர்களில் 2 விக்கெட் இழப்புக்கு 42 ரன்கள் எடுத்து மகத்தான வெற்றியை அடைந்தது.
இந்த டெஸ்ட் வெற்றியின் மூலம் பல சாதனைகளை வங்கதேச அணி நிகழ்த்தியுள்ளது,
* நியூசிலாந்துக்கு எதிராக முதல்முதலாக டெஸ்ட் கிரிக்கெட்டில் வெற்றி பெற்றுள்ளது வங்கதேச அணி. இதற்கு முன்பு விளையாடிய 15 டெஸ்டுகளில் 12-ல் தோற்று 3 டெஸ்டுகளை டிரா செய்திருந்தது.
* ஒருநாள், டி20, டெஸ்ட் என எந்தவகை கிரிக்கெட் போட்டிகளிலும் நியூசிலாந்தை அதன் சொந்த மண்ணில் வங்கதேசம் இதற்கு முன்பு ஜெயித்ததே இல்லை. இதுவே முதல்முறை. 32 ஆட்டங்களில் தோற்ற பிறகு முதல் வெற்றியை வங்கதேசம் அடைந்துள்ளது.
* சொந்த மண்ணில் கடைசியாக விளையாடிய 17 டெஸ்டுகளில் தோற்காத நியூசிலாந்து, தற்போது முதல் தோல்வியைச் சந்தித்துள்ளது. கடைசியாக 2017-ல் தென்னாப்பிரிக்காவுக்கு எதிராகத் தோற்றது. மேலும் சொந்த மண்ணில் தொடர்ச்சியாக 8 டெஸ்ட் தொடர்களில் வென்ற நியூசிலாந்தின் சாதனையும் இந்தத் தோல்வியால் தடைபட்டுள்ளது.
* உலக டெஸ்ட் சாம்பியன்ஷிப் போட்டியில் வங்கதேச அணி பெற்றுள்ள முதல் வெற்றி. முதல் பருவத்தில் விளையாடிய 9 டெஸ்டுகளில் 8-ல் தோற்றது.
* சொந்த மண்ணில் வங்கதேசத்துக்கு எதிராக 9 டெஸ்டுகளில் வென்ற நியூசிலாந்துக்கு முதல்முறையாகத் தோல்வி கிடைத்துள்ளது.
* வெளிநாடுகளில் வங்கதேச அணி பெற்றுள்ள 6-வது டெஸ்ட் வெற்றி இது. இதற்கு முன்பு 2009-ல் மேற்கிந்தியத் தீவுகளில் இரு டெஸ்டுகளிலும் 2013, 2021-ல் ஜிம்பாப்வேவில் இரு டெஸ்டுகளிலும் 2017-ல் இலங்கையில் ஒரு டெஸ்டிலும் வெற்றியைப் பெற்றிருந்தது.
* 2-வது இன்னிங்ஸில் நியூசிலாந்து அணியின் கடைசி 8 விக்கெட்டுகளும் 33 ரன்களுக்கு வீழ்ந்தன. வங்கதேசத்திடம் வேறெந்த அணியும் கடைசி 8 விக்கெட்டுகளை இவ்வளவு குறைந்த ரன்களுக்கு இழந்ததில்லை.
* இந்த டெஸ்டில் வங்கதேச வேகப்பந்து வீச்சாளர்கள் 13 விக்கெட்டுகளை வீழ்த்தியுள்ளார்கள். ஒரு டெஸ்டில் இதுபோல வங்கதேச அணிக்கு நடப்பது இதுவே முதல்முறை.
* 2-வது இன்னிங்ஸில் நியூசிலாந்து அணி 169 ரன்களுக்கு ஆட்டமிழந்தது. வங்கதேச அணிக்கு எதிராக அந்த அணி எடுத்த குறைந்தபட்ச ஸ்கோர் இது. இதற்கு முன்பு 2008-ல் 171 ரன்களுக்கு ஆட்டமிழந்தது.