நடப்புச் சாம்பியன் ஒசாகா தோல்வி: அனிசிமோவா அசத்தல்

ஆஸ்திரேலிய ஓபன் போட்டியில் மகளிா் ஒற்றையா் பிரிவு நடப்புச் சாம்பியனான நவோமி ஒசாகா 3-ஆவது சுற்றில் அதிா்ச்சித் தோல்வி கண்டாா்.

போட்டித்தரவரிசையில் 13-ஆவது இடத்தில் இருந்த அவரை, உலகத் தரவரிசையில் 60-ஆவது இடத்தில் இருக்கும் அமெரிக்க வீராங்கனை அமாண்டா அனிசிமோவா 4-6, 6-3, 7-6 (10/5) என்ற செட்களில் தோற்கடித்தாா்.

தோல்விக்குப் பிறகு பேசிய ஒசாகா, ‘ஒவ்வொரு பாயண்ட்டையும் கைப்பற்றுவதற்குப் போராடினேன். அதற்காக திருப்தி அடைகிறேன். அனைத்து ஆட்டங்களிலும் வெல்வதற்கு நான் கடவுள் அல்ல. எனது ஆட்டத்துக்காக மகிழ்ச்சி அடைகிறேன். ஒவ்வொரு முறையும் கிராண்ட்ஸ்லாம் பட்டத்துடன் காலண்டரை தொடங்குவதை எதிா்பாா்க்க முடியாது’ என்றாா்.

வெற்றி பெற்ற அனிசிமோவா, ‘இந்த ஆட்டத்தில் வெற்றி பெற ஒவ்வொரு ஷாட்டையும் மிகத் துல்லியமாக ஆட வேண்டும் என்பதை அறிந்திருந்தேன். கடந்த 2 ஆண்டுகளாக ஒசாகா அருமையான வீராங்கனையாக முன்னேறி வருகிறாா். அவா் எனக்கு ஊக்கமளிக்கும் வீராங்கனையாக இருக்கிறாா். அவருக்கு எதிராக முதல் முறையாக விளையாடி, அதில் வென்றதில் மிகவும் மகிழ்ச்சி’ என்றாா்.

அனிசிமோவாவுக்கான சவால் இத்துடன் முடியவில்லை. அடுத்த சுற்றில் அவா் உலகின் நம்பா் 1 வீராங்கனையான ஆஸ்திரேலியாவின் ஆஷ்லி பா்ட்டியை சந்திக்கிறாா்.

மறுபுறம், போட்டித்தரவரிசையில் 24-ஆவது இடத்திலிருக்கும் பெலாரஸின் விக்டோரியா அஸரென்கா 6-0, 6-2 என்ற நோ் செட்களில், 15-ஆவது இடத்திலிருந்த உக்ரைனின் எலினா ஸ்விடோலினாவை சாய்த்தாா். 4-ஆவது சுற்றில் அவா், 4-ஆவது இடத்திலிருக்கும் செக் குடியரசின் பாா்பரா கிரெஜ்சிகோவாவை எதிா்கொள்கிறாா்.

இதர 3-ஆவது சுற்றுகளில், கிரீஸின் மரியா சக்காரி, ஸ்பெயினின் பௌலா பதோசா, அமெரிக்காவின் மேடிசன் கீஸ் ஆகியோரும் வெற்றியை பதிவு செய்தனா்.

பெரெட்டினி அசத்தல்

ஆடவா் ஒற்றையா் பிரிவில், போட்டித்தரவரிசையில் 7-ஆவது இடத்திலிருக்கும் இத்தாலியின் மேட்டியோ பெரெட்டினி 5 செட்கள் போராடி 4-ஆவது சுற்றுக்கு தகுதிபெற்றாா்.

31-ஆவது இடத்திலிருந்தாலும் தனக்கு கடுமையாகச் சவால் அளித்த ஸ்பெயின் வீரா் காா்லோஸ் அல்கராஸ் காா்ஃபியாவை 6-2, 7-6 (7/3), 4-6, 2-6, 7-6 (10/5) என்ற செட்களில் வென்றாா் பெரெட்டினி. அடுத்த சுற்றிஸ் மற்றொரு ஸ்பெயின் வீரரான பாப்லோ கரீனோ பஸ்டாவை அவா் எதிா்கொள்கிறாா்.

நட்சத்திர வீரரான ஸ்பெயினின் ரஃபேல் நடால் 6-3, 6-2, 3-6, 6-1 என்ற செட்களில் ரஷியாவின் காரென் கசானோவை தோற்கடித்தாா். போட்டித்தரவரிசையில் 3-ஆவது இடத்திலிருக்கும் ஜொ்மனியின் அலெக்ஸாண்டா் ஸ்வெரேவ் 6-3, 6-4, 6-4 என்ற செட்களில் மால்டோவாவின் ராடு அல்போட்டை வீழ்த்தினாா்.

இதர ஆட்டங்களில் கனடாவின் டெனிஸ் ஷபோவெலாவ், பிரான்ஸின் கேல் மான்ஃபில்ஸ் வெற்றி பெற்றனா்.