இந்தியா - பாகிஸ்தான் - ஆஸ்திரேலியா ஆகிய மூன்று அணிகளும் மோதும் முத்தரப்புப் போட்டியை ஆஸ்திரேலியாவில் நடத்த கிரிக்கெட் ஆஸ்திரேலியா விருப்பம் தெரிவித்துள்ளது.
அரசியல் சூழல் காரணமாக 2012-13-க்குப் பிறகு இந்தியாவும் பாகிஸ்தானும் இணைந்து கிரிக்கெட் போட்டிகளில் விளையாடுவதில்லை. ஐசிசி, ஆசிய கிரிக்கெட் கவுன்சில் போட்டிகளில் மட்டுமே இரு நாடுகளும் மோதுகின்றன. இந்த நிலையை மாற்ற பாகிஸ்தான் கிரிக்கெட் வாரியத் தலைவர் ரமீஸ் ராஜா முயற்சி எடுத்து வருகிறார். இந்தியா, பாகிஸ்தான், ஆஸ்திரேலியா, இங்கிலாந்து என நான்கு நாடுகளும் பங்கேற்கும் டி20 போட்டியை நடத்த ரமீஸ் ராஜா திட்டமிட்டு இதுபற்றி ஐசிசி கூட்டத்தில் விவாதிக்கவுள்ளதாக ட்விட்டரில் ஜனவரி மாதம் தெரிவித்தார். இந்தப் போட்டியை ஒவ்வொரு வருடமும் நடத்துவதன் மூலம் இந்தியாவும் பாகிஸ்தானும் சர்வதேச ஆட்டங்களில் அடிக்கடி மோதும் நிலைமை உருவாகும், இதன் வழியாக அதிக வருமானமும் கிடைக்கும் என்பதால் இதற்கான ஏற்பாடுகளை ரமீஸ் ராஜா செய்து வருகிறார்.
இந்நிலையில் இந்தியா - பாகிஸ்தான் - ஆஸ்திரேலியா ஆகிய மூன்று அணிகளும் மோதும் முத்தரப்புப் போட்டியை ஆஸ்திரேலியாவில் நடத்த கிரிக்கெட் ஆஸ்திரேலியா விருப்பம் தெரிவித்துள்ளது. பாகிஸ்தானின் ராவல்பிண்டியில் கிரிக்கெட் ஆஸ்திரேலியாவின் தலைமைச் செயல் அதிகாரி ஹாக்லி, செய்தியாளர்களிடம் கூறியதாவது:
முத்தரப்புப் போட்டி எனக்கு மிகவும் பிடிக்கும். கடந்த காலத்தில் நன்கு நடைபெற்றன. இந்தியா, பாகிஸ்தான், ஆஸ்திரேலியா அணிகள் மோதும் முத்தரப்புப் போட்டியை நடத்த ஆர்வமாகவே உள்ளோம். ஆஸ்திரேலியாவில் ஏராளமான இந்தியர்களும் பாகிஸ்தானியர்களும் வசிக்கிறார்கள். இந்தியாவும் பாகிஸ்தானும் மோதும் போட்டியைக் காண அனைவரும் ஆவலாக உள்ளார்கள். இதை நாங்கள் நடத்தத் தயாராக உள்ளோம். அக்டோபர் 23 அன்று மெல்போர்ன் மைதானத்தில் இந்தியாவும் பாகிஸ்தானும் மோதும் ஆட்டத்துக்கான அனைத்து டிக்கெட்டுகளும் விற்றுத் தீர்ந்துவிட்டன என்றார்.