சையத் முஷ்டாக் அலி டி20 போட்டியில் மும்பை வீரர் பிருத்வி ஷா 46 பந்துகளில் சதமடித்து அசத்தியுள்ளார்.
ராஜ்கோட்டில் அஸ்ஸாம் அணிக்கு எதிரான ஆட்டத்தில் மும்பை அணி 20 ஓவர்களில் 3 விக்கெட் இழப்புக்கு 230 ரன்கள் எடுத்துள்ளது. மும்பை கேப்டன் பிருத்வி ஷா, 61 பந்துகளில் 9 சிக்ஸர்கள், 13 பவுண்டரிகளுடன் 134 ரன்கள் எடுத்து அசத்தினார்.
டி20 கிரிக்கெட்டில் முதல்முறையாக சதமடித்துள்ளார் பிருத்வி ஷா. அரை சதத்தை 19 பந்துகளிலும் சதத்தை 46 பந்துகளிலும் எட்டினார். 5-வது ஓவரில் 2 சிக்ஸர்களும் 4 பவுண்டரிகளும் அடித்து எதிரணியை நிலைகுலைய வைத்தார்.
இந்த வருட சையத் முஷ்டாக் அலி கோப்பைப் போட்டியில் பிருத்வி ஷா எடுத்த ரன்கள்: 55*(34), 29(12) & 134(61). இதையடுத்து இந்திய டி20 அணியில் பிருத்வி ஷா விரைவில் இடம்பெறுவார் என்கிற எதிர்பார்ப்பு ஏற்பட்டுள்ளது.