ஜிம்பாப்வே அணிக்கு எதிராகத் தோற்ற பாகிஸ்தான் அணி டி20 உலகக் கோப்பைப் போட்டியில் நெருக்கடியை எதிர்கொண்டுள்ளது.
பெர்த் நகரில் நடைபெற்ற டி20 உலகக் கோப்பை ஆட்டத்தில் முதலில் பேட்டிங் செய்த ஜிம்பாப்வே அணி, 20 ஓவர்களில் 8 விக்கெட் இழப்புக்கு 130 ரன்கள் எடுத்தது. வில்லியம்ஸ் அதிகபட்சமாக 31 ரன்கள் எடுத்தார். முகமது வாசிம் 4 விக்கெட்டுகள் எடுத்தார்.
இலக்கை விரட்டியபோது தடுமாறிய பாகிஸ்தான் அணி, 20 ஓவர்களில் 8 விக்கெட் இழப்புக்கு 129 ரன்கள் எடுத்து 1 ரன் வித்தியாசத்தில் தோல்வியடைந்தது. கடைசிப் பந்தில் வெற்றி பெற 3 ரன்கள் தேவைப்பட்டபோது 1 ரன் மட்டும் எடுத்து ரன் அவுட் ஆனார் ஷாஹீன் அப்ரிடி. சிகந்தர் ராஸா 3 விக்கெட்டுகளை வீழ்த்தி ஆட்ட நாயகன் விருதை வென்றார்.
இந்தத் தோல்வியினால் பாகிஸ்தான் அணி அரையிறுதிக்குத் தகுதி பெறுவது மேலும் கடினமாகியுள்ளது. கீழ்க்கண்ட முறையில் இதர ஆட்டங்களின் முடிவுகள் அமைந்தால் பாகிஸ்தானால் அரையிறுதிக்குத் தகுதி பெற முடியும்.
* மீதமுள்ள 3 ஆட்டங்களிலும் பாகிஸ்தான் வெற்றி பெற வேண்டும். அப்போது பாகிஸ்தான் வசம் 6 புள்ளிகள் இருக்கும்.
* இந்தியா எல்லா ஆட்டங்களிலும் வெற்றி பெற வேண்டும். இதனால் இந்தியாவிடம் 10 புள்ளிகள் இருக்கும்.
* மீதமுள்ள 3 ஆட்டங்களில் இரண்டிலாவது தென்னாப்பிரிக்கா தோற்க வேண்டும். தற்போது 3 புள்ளிகளைக் கொண்டிருக்கும் தெ.ஆ. அணி அப்போது 5 புள்ளிகளை மட்டுமே கொண்டிருக்கும்.
* தற்போது 3 புள்ளிகளைக் கொண்டிருக்கும் ஜிம்பாப்வே மீதமுள்ள 3 ஆட்டங்களில் இரண்டிலாவது தோற்க வேண்டும். அப்போது ஜிம்பாப்வே அணியிடமும் 5 புள்ளிகள் மட்டுமே இருக்கும்.
இதன் அடிப்படையில் பாகிஸ்தான் அணி அரையிறுதிக்குத் தகுதி பெற முடியும்.
ஆனால் அடுத்ததாக ஜிம்பாப்வே அணி வங்கதேசத்தையும் நெதர்லாந்தையும் வீழ்த்தி இந்தியா, பாகிஸ்தானிடம் தென்னாப்பிரிக்கா தோற்றால் ஜிம்பாப்வே அணி அரையிறுதிக்குத் தகுதி பெற்று விடும்.