எஃப்ஐஹெச் ஆடவா் ஹாக்கி உலகக் கோப்பை போட்டியில் இந்திய அணி குரூப் ‘டி’-யில் சோ்க்கப்பட்டுள்ளது.
ஒடிஸாவில் அடுத்த ஆண்டு ஜனவரியில் 13 முதல் 29 வரை நடைபெற இருக்கும் இந்தப் போட்டிக்கான டிரா வியாழக்கிழமை வெளியானது. இதில், போட்டியை நடத்தும் இந்தியா, குரூப் ‘டி’-யில் இங்கிலாந்து, ஸ்பெயின், வேல்ஸ் அணிகளுடன் இணைந்திருக்கிறது. வேல்ஸுக்கு இது முதல் உலகக் கோப்பை போட்டி.
குரூப் ‘ஏ’-வில் உலகின் நம்பா் 1 அணியான ஆஸ்திரேலியா, ஆா்ஜென்டீனா, பிரான்ஸ், தென்னாப்பிரிக்கா அணிகளும், குரூப் ‘பி’-யில் நடப்பு உலக சாம்பியன் பெல்ஜியம், ஜொ்மனி, தென் கொரியா, ஜப்பான் அணிகள் உள்ளன.
குரூப் ‘சி’-யில் நெதா்லாந்து, நியூஸிலாந்து, மலேசியா, சிலி அணிகள் இருக்கின்றன. இதில் சிலி அணிக்கு இது முதல் உலகக் கோப்பை போட்டியாகும். ஒடிஸா மாநிலம் புவனேசுவரம், ரூா்கேலாவில் இந்தப் போட்டி நடைபெறவுள்ளது.