மேற்கிந்தியத் தீவுகள் அணிக்கு இரு புதிய கேப்டன்கள்!

மேற்கிந்தியத் தீவுகள் அணியின் வெள்ளைப் பந்து கேப்டன்களாக ஷாய் ஹோப்பும் ரோவ்மேன் பவலும் தேர்வாகியுள்ளார்கள்.

ஆஸ்திரேலியாவில் நடைபெற்ற டி20 உலகக் கோப்பைப் போட்டியில் முதல் சுற்றில் மோசமாக விளையாடிய மேற்கிந்தியத் தீவுகள் அணி, சூப்பர் 12 தகுதி பெறாமல் வெளியேறியது. இதையடுத்து தலைமைப் பயிற்சியாளர் பில் சிம்மன்ஸ் தனது பதவியை ராஜிநாமா செய்தார். பிறகு, கேப்டன் பதவியை ராஜிநாமா செய்வதாக நிகோலஸ் பூரன் அறிவித்தார். பூரன் தலைமை தாங்கிய 15 ஒருநாள் ஆட்டங்களில் 4 வெற்றிகளையும் 15 டி20 ஆட்டங்களில் 4 வெற்றிகளையும் அடைந்தது மே.இ. தீவுகள் அணி. டி20 உலகக் கோப்பையில் ஸ்காட்லாந்து, அயர்லாந்து அணிகளிடம் மே.இ. தீவுகள் அணி தோற்றது. ஒரு பேட்டராகவும் பூரனின் பங்களிப்பு மோசமாகவே இருந்தது.

அதற்குப் பிறகு அடுத்த மார்ச் மாதத்தில் தான் வெள்ளைப் பந்து கிரிக்கெட்டில் விளையாடவுள்ளது. தென்னாப்பிரிக்காவுக்கு எதிராக 3 ஒருநாள், 3 டி20 ஆட்டங்களில் விளையாடவுள்ளது. இதையடுத்து மேற்கிந்தியத் தீவுகள் அணியின் வெள்ளைப் பந்து கேப்டன்களாக ஷாய் ஹோப்பும் ரோவ்மேன் பவலும் தேர்வாகியுள்ளார்கள். ஒருநாள் அணிக்கு ஷாய் ஹோப்பும் டி20க்கு ரோவ்மேன் பவலும் கேப்டன்களாக நியமிக்கப்பட்டுள்ளார்கள்.