டி20 தொடரை வென்றது ஆஸ்திரேலியா

நவி மும்பை: இந்திய மகளிருக்கு எதிரான 3-ஆவது டி20 ஆட்டத்தில் 7 விக்கெட்டுகள் வித்தியாசத்தில் செவ்வாய்க்கிழமை வென்ற ஆஸ்திரேலியா, தொடரை 2-1 என கைப்பற்றியது. 
இந்தியா வந்த ஆஸ்திரேலிய அணி, டெஸ்ட்டில் மட்டும் தோல்வி கண்டு,  ஒருநாள் (3-0) மற்றும் டி20 தொடர்களை வென்றிருக்கிறது. 
முன்னதாக, இந்த 3-ஆவது டி20 ஆட்டத்தில் டாஸ் வென்ற ஆஸ்திரேலியா, ஃபீல்டிங்கை தேர்வு செய்தது. இந்திய இன்னிங்ஸின் தொடக்க வீராங்கனைகளில் ஷஃபாலி வர்மா 6 பவுண்டரிகளுடன் 26 ரன்களுக்கு வெளியேற, ஒன் டவுனாக வந்த ஜெமிமா ரோட்ரிக்ஸ் 2 ரன்களுக்கு ஆட்டமிழந்து ஏமாற்றமளித்தார். 
3-ஆவது விக்கெட்டாக, தொடக்க வீராங்கனைகளில் மற்றொருவரான ஸ்மிருதி மந்தனா 2 பவுண்டரிகள், 1 சிக்ஸர் உள்பட 29 ரன்களுக்கு விக்கெட்டை இழந்தார். தொடர்ந்து வந்தோரில் கேப்டன் ஹர்மன்பிரீத் கெளர் 3 ரன்களுக்கு ஆட்டத்தை முடித்துக் கொள்ள, 6-ஆவது பேட்டராக வந்த தீப்தி சர்மா 2 பவுண்டரிகளுடன் 14 ரன்கள் சேர்த்து பெவிலியன் திரும்பினார். 
அணியின் ஸ்கோரை அதிகரிக்க உதவிய ரிச்சா கோஷ் 2 பவுண்டரிகள், 3 சிக்ஸர்கள் உள்பட 34 ரன்களுக்கு கடைசி விக்கெட்டாக வீழ்ந்தார். ஓவர்கள் முடிவில் அமன்ஜோத் கெளர் 2 பவுண்டரிகளுடன் 17, பூஜா வஸ்த்ரகர் 1 சிக்ஸருடன் 7 ரன்களுக்கு ஆட்டமிழக்காமல் இருந்தனர். 
ஆஸ்திரேலிய பெளலிங்கில் அனபெல் சதர்லேண்ட், ஜார்ஜியா வேர்ஹாம் ஆகியோர் தலா 2, மீகன் ஸ்கட், ஆஷ்லே கார்டனர் ஆகியோர் தலா 1 விக்கெட் வீழ்த்தினர். 
பின்னர் ஆஸ்திரேலிய இன்னிங்ஸில் கேப்டன் அலிசா ஹீலி - பெத் மூனி முதல் விக்கெட்டுக்கே 85 ரன்கள் சேர்த்து அணியின் வெற்றிக்கு அடித்தளம் அமைத்தனர்.
 இதில் ஹீலி 9 பவுண்டரிகள், 1 சிக்ஸர் உள்பட 55 ரன்களுக்கு ஆட்டமிழந்தார். தொடர்ந்து வந்த டாலியா மெக்ராத் 4 பவுண்டரிகளுடன் 20 ரன்களுக்கு வெளியேற, எலிஸ் பெரி டக் அவுட்டானார். 
முடிவில் பெத் மூனி 5 பவுண்டரிகள் உள்பட 52, போப் லிட்ச்ஃபீல்டு 17 ரன்களுடன் அணியை வெற்றிக்கு வழிநடத்தி ஆட்டமிழக்காமல் இருந்தனர். 
இந்திய பெளலிங்கில் பூஜா வஸ்த்ரகர் 2, தீப்தி சர்மா 1 விக்கெட் எடுத்தனர். 

இந்தியா

20 ஓவர்கள்

ரிச்சா கோஷ்    34
ஸ்மிருதி மந்தனா    29
ஷஃபாலி வர்மா    26

பந்துவீச்சு

அனபெல் சதர்லேண்ட்    2/12
ஜார்ஜியா வேர்ஹாம்    2/24
மீகன் ஸ்கட்    1/36

ஆஸ்திரேலியா

அலிசா ஹீலி    55
பெத் மூனி    52*
டாலியா மெக்ராத்    20

பந்துவீச்சு

பூஜா வஸ்த்ரகர்    2/26
தீப்தி சர்மா    1/32
டைட்டஸ் சாது    0/23