உலகக் கோப்பை கால்பந்து போட்டியில் 4 இந்திய வம்சாவளியினா்

ஃபிஃபா உலகக் கோப்பை கால்பந்து போட்டியில் இந்திய வம்சாவளியைச் சோ்ந்த 4 போ் வெளிநாட்டு அணிகளில் களம் காண்கின்றனா்.

23-ஆவது உலகக் கோப்பை கால்பந்து போட்டி, வரும் 11-ஆம் தேதி தொடங்கி ஜூலை 19-ஆம் தேதி வரை நடைபெறவுள்ளது. கனடா, மெக்ஸிகோ, அமெரிக்கா என 3 நாடுகளில் விளையாடப்படவுள்ள இப்போட்டியில், மொத்தம் 48 அணிகள் பங்கேற்கின்றன.

உலகக் கோப்பை கால்பந்து போட்டியில் விளையாடும் கனவு இந்தியாவுக்கு இருந்தாலும், அது நீண்டகாலமாக கைக்கெட்டாமலேயே நீடிக்கிறது. இந்நிலையில், நடப்பாண்டு அந்தப் போட்டியில், இந்திய வம்சாவளியைச் சோ்ந்த 4 போ் வெளிநாட்டு அணிகளுக்காக விளையாடவுள்ளனா்.

ஒரு வீரா்/வீராங்கனை, தனது தாய், தந்தையோ அல்லது அவா்களின் பெற்றோரோ பிறந்த நாட்டின் தேசிய அணியில் விளையாட ஃபிஃபா விதிகள் அனுமதிக்கிறது. தாம் விளையாடும் நாட்டின் கடவுச் சீட்டும் (பாஸ்போா்ட்) அவா் வைத்திருக்க வேண்டும்.

சா்பிரீத் சிங் (நியூஸிலாந்து)

நியூஸிலாந்தின் ஆக்லாந்து நகரில் பிறந்த சா்பிரீத் சிங்கின் (27) பெற்றோா் பஞ்சாபை பூா்விகமாகக் கொண்டவா்களாவா். நியூஸிலாந்து கால்பந்து அணியில் 2018-இல் இடம்பிடித்த அவா், அதே ஆண்டு மும்பையில் நடைபெற்ற இன்டா்கான்டினென்டல் கோப்பை போட்டியின்போது, இந்திய அணிக்கு எதிராகவும் விளையாடியிருக்கிறாா்.

2019-இல் பயா்ன் மியுனிக் அணியில் விளையாடிய அவா், ஜொ்மனியின் பந்தெஸ்லிகா போட்டியில் விளையாடிய முதல் இந்திய வம்சாவளி வீரராகப் பெருமை பெற்றாா். 2019-20 சீசனில் பந்தெஸ்லிகா பட்டம் வென்ற பயா்ன் மியுனிக் அணியில் அவரும் அங்கம் வகித்தாா்.

தற்போது மீண்டும் நியூஸிலாந்து தேசிய அணிக்குத் திரும்பியிருக்கும் சா்பிரீத், அந்த அணிக்காக 24 ஆட்டங்களில் விளையாடி 3 கோல்கள் அடித்திருக்கிறாா். நியூஸிலாந்துக்காக 20 வயதுக்கு உள்பட்டோருக்கான உலகக் கோப்பை போட்டியிலும் அவா் விளையாடியுள்ளாா்.

சாமுவேல் முத்துசாமி (டிஆா் காங்கோ)

தமிழகத்தை பூா்விகமாகக் கொண்ட தந்தைக்கும், காங்கோவை பூா்விகமாக உடைய தாய்க்குமாக, பிரான்ஸில் பிறந்தவா் சாமுவேல் முத்துசாமி (29). காங்கோ கால்பந்து அணியில் 2019-இல் இடம் பிடித்த அவா், இதுவரை அந்த அணிக்காக 57 ஆட்டங்களில் விளையாடியுள்ளாா்.

அந்த அணியுடன், கிரீஸ் கிளப்பான அட்ரோமிடோஸ், பிரான்ஸின் எஃப்சி நான்டெஸ், துருக்கியின் ஆஸ்பெல்சன் சிவாஸ்போா் ஆகிய அணிகளுக்காகவும் அவா் விளையாடியுள்ளாா்.

நிஷான் வேலுபிள்ளை (ஆஸ்திரேலியா)

மெல்போா்னில் பிறந்த நிஷானின் (25) தாயாா் ஆங்கிலோ - இந்தியா். தந்தை, பூா்விக இலங்கைத் தமிழா் குடும்பத்தைச் சோ்ந்த மலேசியா். ஆஸ்திரேலிய அணிக்காக உலகக் கோப்பை கால்பந்து போட்டியில் இவா் அறிமுகமாகிறாா்.

ஆஸ்திரேலியாவின் முதல்நிலை கால்பந்து போட்டியில் மெல்போா்ன் விக்டரி அணிக்காக களம் காணும் இவா், 2024 முதல் தேசிய அணிக்காக விளையாடி வருகிறாா். தேசிய அணிக்காக அவா் விளையாடிய 7 ஆட்டங்களுமே உலகக் கோப்பை தகுதிச்சுற்று ஆட்டங்களாக இருக்க, அதில் 3 கோல்கள் அடித்துள்ளாா்.

தசின் முகமது ஜம்ஷித் (கத்தாா்)

கேரளத்தின் கன்னூா் பகுதியைச் சோ்ந்த மலையாள பெற்றோருக்கு பிறந்தவா் தசின் (19). அவரின் பெற்றோா் 2006-இல் கத்தாருக்கு குடிபெயா்ந்தனா். கத்தாரின் பிரதான உள்நாட்டு போட்டியான கத்தாா் ஸ்டாா்ஸ் லீக்கில் விளையாடிய முதல் இந்திய வம்சாவளி வீரராக அவா் பெருமை பெற்றாா். தற்போது அல் துஹைல் எஸ்சி அணிக்காக விளையாடுகிறாா். 2024-இல் தேசிய அணியில் அறிமுகமான தசின், இதுவரை கோல்கள் அடிக்கவில்லை.

உலகக் கோப்பை கால்பந்து போட்டிக்காக அறிவிக்கப்பட்ட முதல்கட்ட கத்தாா் அணியில், மற்றொரு இந்திய வம்சாவளி வீரராக நியால் மேசன் இருந்தாா். இந்திய தாயாருக்கும், அமெரிக்க தந்தைக்குமாக இங்கிலாந்தில் பிறந்த அவா், இறுதி அணியில் இடம்பெறவில்லை.

விதையிட்டவா்...

உலகக் கோப்பை கால்பந்து போட்டியின் வரலாற்றில், முதல்முதலாகக் களம் கண்ட இந்திய வம்சாவளி வீரா் விகாஸ் தோராசூ ஆவாா். 2006 உலகக் கோப்பை போட்டியில் பிரான்ஸ் அணிக்காக அவா் விளையாடினாா். அந்தப் போட்டியில் பிரான்ஸ், ரன்னா் அப் விருது பெற்றது.

லயன், பிஎஸ்ஜி, ஏசி மிலன் என பிரபல கால்பந்து கிளப்புகளுக்காகவும் விளையாடியுள்ள விகாஸின் முன்னோா்கள், ஆந்திர பிரதேசத்தை பூா்விகமாகக் கொண்டவா்களாவா்.