வீராம்பட்டினம் செங்கழுநீரம்மன் தேவஸ்தான தேர்த்திருவிழா: முதல்வர் பங்கேற்பு

பிரசித்திபெற்ற வீராம்பட்டினம் செங்கழுநீரம்மன் தேவஸ்தான ஆடிப் பெருவிழா தேரோட்டம் வெள்ளிக்கிழமை சிறப்பாக நடைபெற்றது.

ஒவ்வொரு ஆண்டும் ஆடி மாதம் முதல் வெள்ளிக்கிழமையிலிருந்து ஆறு வெள்ளிக்கிழமைகள் தொடர்ச்சியாக வீராம்பட்டினமே திருவிழாக்கோலம் பூண்டிருக்கும். ஐந்தாம் வெள்ளியன்று தேர்த்திருவிழா நடைபெறும். ஆறாம் வெள்ளியன்று முத்துப் பல்லக்கு திருவிழா நடைபெறும். இந்த ஆலையத்தில் உள்ள தேவதாருவின் முழு உருவம் மரத்தால் செய்யப்பட்டடு அமைக்கப்பட்டது.

அலங்கரிக்கப்பட்ட தேரில் செங்கழுநீரம்மன் தேரடி வீதியில் உலா வந்து தேர் முற்றத்தில் வந்து நிற்கும். இந்த தேர் திருவிழாவின் சிறப்பு, பிரஞ்சு ஆட்சிக்கலாம் முதலே ஆளுநர் தேரின் வடம் பிடித்து தேரோட்டத்தை தொடங்கிவைப்பர். இந்த வழக்கம் இன்றும் அனுசரிக்கப்படுகிறது

இக்கோயிலின் ஆடிப்பெருவிழா கடந்த 6-ம் தேதி கொடியேற்றத்துடன் தொடங்கியது. 7-ம் தேதி விமானத்தில் அம்மன் வீதி உலா நடைபெற்றது. பின்னர் நாகம், ரிஷபம், சிம்மம், யானை, குதிரை, அன்ன வாகனங்களில் அம்மன் திருவீதி உலா நடந்தது.

தேர்த் திருவிழா

இதன் முக்கிய நிகழ்வான தேர்த்திருவிழா வெள்ளிக்கிழமை நடைபெற்றது.

முதல்வர் என்.ரங்கசாமி, பேரவைத் தலைவர் சபாபதி, அமைச்சர்கள் ராஜவேலு, பன்னீர்செல்வம் ஆகியோர் பங்கேறறு தேரை வடம் பிடித்து தொடங்கி வைத்தனர்.முக்கிய வீதிகள் வழியாக சென்று தேர் நிலையை அடைந்தது. புதுவை,மற்றும் தமிழகத்தில் இருந்து ஆயிரக்கணக்கான மக்கள் தேர்த் திருவிழாவில் கலந்து கொண்டனர்.

பல்வேறு அமைப்புகள் சார்பில் பக்தர்களுக்கு அன்னதானம், நீர், மோர் வழங்கப்பட்டது.சனிக்கிழமை இரவு முத்துக்களால் அலங்கரிக்கப்பட்ட தெப்பல் உற்சவம், வரும் 21-ம் தேதி இரவு அலங்கரிக்கப்பட்ட பல்லக்கில் முத்துப்பல்லக்கில் வீதி உலா நடக்கிறது. விழா ஏற்பாடுகளை கோயில் அறங்காவலர் குழுவினர், ஊர் மக்கள் செய்திருந்தனர்..