சேலம் அரசு மருத்துவமனையில் நடிகர் மன்சூர் அலிகான் அனுமதி

சேலம் மத்திய சிறையில் அடைக்கப்பட்டுள்ள மன்சூர் அலிகானுக்கு உடல்நலக்குறைவு ஏற்பட்டுள்ளது.

சேலம் விமான நிலைய விரிவாக்கப் பணிக்கு எதிர்ப்புத் தெரிவித்து தும்பிப்பாடி மாரியம்மன் கோயில் திடலில் கடந்த மே 3 ஆம் தேதி விவசாயிகள் நடத்திய கூட்டத்தில் நடிகர் மன்சூர் அலிகான் கலந்து கொண்டு பேசினார். அப்போது பசுமை வழிச் சாலை, விமான நிலைய விரிவாக்கத் திட்டங்களுக்கு எதிராகப் பேசியதாகவும், பொதுமக்களைத் துண்டி விட்டதாகவும் கூறி கடந்த ஜூன் 17 ஆம் தேதி தீவட்டிப்பட்டி போலீஸார், நடிகர் மன்சூர் அலி கான் மீது வழக்குப் பதிவு செய்தனர்.

இதையடுத்து, சென்னை சென்று நடிகர் மன்சூர் அலி கானைக் கைது செய்து, சேலம் அழைத்து வந்து மத்திய சிறையில் அடைத்தனர். சிறையில் நடிகர் மன்சூர் அலிகான் சனிக்கிழமை திடீரென உண்ணாவிரதம் மேற்கொண்டதால் பரபரப்பு ஏற்பட்டது. இதைத்தொடர்ந்து, சிறைத் துறை அதிகாரிகள் அவரிடம் பேச்சுவார்த்தை நடத்தினர். இதையடுத்து, மன்சூர் அலிகான் உண்ணாவிரதத்தைக் கைவிட்டார். 

இந்நிலையில் சேலம் மத்திய சிறையில் அடைக்கப்பட்டுள்ள மன்சூர் அலிகானுக்கு இன்று உடல் நலக்குறைவு ஏற்பட்டுள்ளது. இதையடுத்து அவர் சேலம் மருத்துவமனையில் சிகிச்சைக்காக அனுமதிக்கப்பட்டுள்ளார்.