பிளாஸ்டிக் தீமைகள் குறித்து 32 மாவட்டங்களில் விழிப்புணர்வுப் பிரசாரம்

பிளாஸ்டிக்கின் தீமைகள் குறித்து 32 மாவட்டங்களிலும் விழிப்புணர்வுப் பிரசாரம் மேற்கொள்ளப்படும் என்று சுற்றுச்சூழல்துறை அமைச்சர் கே.சி.கருப்பணன் தெரிவித்தார்.
சட்டப்பேரவையில் சுற்றுச்சூழல் துறை மானியக் கோரிக்கை மீதான விவாதத்துக்குப் பிறகு அமைச்சர் கே.சி.கருப்பணன் வெளியிட்ட அறிவிப்புகள்: சூழல் முக்கியத்துவத்தை மாணவர்கள் உணரும் வகையில் தேசிய பசுமைப் படை மற்றும் சூழல் மன்ற மாணவ, மாணவிகளுக்கு விநாடி-வினா, பேச்சுப் போட்டி, ஓவியப் போட்டி ஆகிய மூன்று இனங்களில் எட்டாம் வகுப்புக்குக் கீழ் மற்றும் எட்டாம் வகுப்புக்கு மேல் என இரண்டு பிரிவுகளாகச் சூழல் போட்டிகள் நடத்தப்படும். 
மேற்கூறிய மூன்று இனங்கள் மற்றும் இரண்டு பிரிவுகளில் வெற்றிபெற்ற மாணவ, மாணவிகளுக்கு மாவட்டத்துக்கு தலா ரூ.2 லட்சம் வீதம் 32 மாவட்டங்களுக்கு ரூ.64 லட்சம் செலவில் பரிசுத் தொகை மற்றும் சான்றிதழ்கள் தனித்தனியாக வழங்கப்படும். மேலும், சூழல் சுற்றுலாவுக்கும் அழைத்துச் செல்லப்படுவர்.
பிளாஸ்டிக் தீமைகள் குறித்து மாணவர்களும், பொதுமக்களும் புரிந்துணர்வைப் பெறும் வகையில் மாவட்டங்களில் 20 இடங்களில், வாகனங்கள் மூலம் கலைக் குழுக்களின் பங்களிப்புடன் தேர்ந்தெடுக்கப்பட்ட அரசு சாரா நிறுவனங்கள் மூலம் பல்வேறு நிகழ்ச்சிகள் நடத்த உத்தேசிக்கப்பட்டுள்ளது. இந்தத் திட்டம் தலா ரூ.2 லட்சம் வீதம் 32 மாவட்டங்களில் மொத்தம் ரூ.64 லட்சம் செலவில் செயல்படுத்தப்படும்.
கும்மிடிப்பூண்டி மற்றும் திருப்பூர் (தெற்கு) ஆகிய இரண்டு மாவட்ட அலுவலகங்களுக்கு வாரிய நிதியிலிருந்து ரூ.4 கோடி செலவில் சொந்தக் கட்டடங்கள் கட்டப்படும்.
தமிழ்நாடு மாசு கட்டுப்பாட்டு வாரிய பணியாளர்களின் உடல் நலனைக் காக்கும் பொருட்டு 45 வயதுக்கு மேற்பட்ட பணியாளர்களுக்கு 2 ஆண்டுகளுக்கு ஒரு முறையும் தலா ஒரு நபருக்கு ரூ.3,000 செலவில் முழு உடல் பரிசோதனை செய்ய திட்டமிடப்பட்டுள்ளது. இந்த ஆண்டுக்கு ரூ.15 லட்சம் செலவில் தமிழ்நாடு மாசு கட்டுப்பாட்டு வாரிய நிதியிலிருந்து செயல்படுத்தப்படும் என்றார்.