மு.க.ஸ்டாலினுக்கு புதுச்சேரி முதல்வர் நாராயணசாமி பிறந்த நாள் வாழ்த்து 

திமுக செயல் தலைவர் மு.க.ஸ்டாலினுக்கு புதுச்சேரி முதல்வர் நாராயணசாமி பிறந்தநாள் வாழ்த்து தெரிவித்துள்ளார்.

திமுக செயல் தலைவர் மு.க.ஸ்டாலின் இன்று தனது 65ஆவது பிறந்த நாளை கொண்டாடுகிறார். இதையொட்டி சென்னை மெரினாவில் உள்ள அண்ணா நினைவிடத்தில் மு.க.ஸ்டாலின் மலர்தூவி மரியாதை செலுத்தினார். தொடர்ந்து பெரியார் நினைவிடத்திலும் அவர் மரியாதை செலுத்தினார். அப்போது மு.க.ஸ்டாலினுடன் துரைமுருகன், டி.ஆர்.பாலு, ஆ.ராசா உள்ளிட்டோர் உடனிருந்தார்.

மேலும் மு.க.ஸ்டாலினுக்கு பல்வேறு தலைவர்களும் தொடர்ந்து வாழ்த்து தெரிவித்து வருகின்றனர். பாஜக மாநிலத் தலைவர் தமிழிசை செளந்தரராஜன், ‘சகோதரர் திமுக செயல்தலைவர் மு.க.ஸ்டாலினுக்கு தமிழக பாஜக சார்பில் எனது பிறந்தநாள் வாழ்த்துக்களை தெரிவித்துக்கொள்கிறேன்’ என அவர் தனது டிவிட்டர் பதிவில் வாழ்த்து கூறியுள்ளார். இதேபோல் நடிகர் ரஜினிகாந்த் தொலைபேசி வாயிலாக மு.க.ஸ்டாலினுக்கு வாழ்த்து தெரிவித்துள்ளார். 

முன்னதாக சென்னையில் மு.க.ஸ்டாலினை நேரில் சந்தித்து தமிழ்நாடு காங்கிரஸ் கட்சித் தலைவர் திருநாவுக்கரசர், குமரி ஆனந்தன் உள்ளிட்டோர் பிறந்தநாள் வாழ்த்து தெரிவித்துள்ளனர். அவர்களை தொடர்ந்து மு.க.ஸ்டாலினை நேரில் சென்று சந்தித்து புதுவை முதல்வர் நாராயணசாமியும் வாழ்த்து கூறியுள்ளார்.