பெட்ரோல், டீசல் விலை தொடா்ந்து 4-வது நாளாக அதிகரிப்பு

புது தில்லி: பெட்ரோல், டீசல் விலையில் மாற்றம் செய்யப்படுவது இரண்டு வாரங்களுக்கும் மேலாக நிறுத்தி வைக்கப்பட்டிருந்த நிலையில், அவற்றின் விலையை தொடா்ந்து 4-ஆவது நாளாக எண்ணெய் நிறுவனங்கள் வெள்ளிக்கிழமை அதிகரித்தன.

பெட்ரோல், டீசல் விலையை தொடா்ந்து அதிகரித்தும், சில நேரங்களில் குறைத்தும் வந்த எண்ணெய் நிறுவனங்கள் கடந்த மாதம் 15-ஆம் தேதி அவற்றின் விலையை சிறிதளவு குறைத்தன. அதன்பின்னா் அவற்றின் விலையில் மாற்றம் செய்வதை எண்ணெய் நிறுவனங்கள் நிறுத்திவைத்தன. மேற்கு வங்கம் உள்பட 5 மாநில சட்டப்பேரவைத் தோ்தல் முடியும் வரை பெட்ரொல், டீசல் விலையில் மாற்றம் செய்யப்படவில்லை. இந்நிலையில், 18 நாள்களுக்கு பின்னா் கடந்த செவ்வாய்க்கிழமை பெட்ரோல் விலை லிட்டருக்கு 15 காசுகள், டீசல் விலை லிட்டருக்கு 18 காசுகள் உயா்த்தப்பட்டன.

அவற்றின் விலை தொடா்ந்து 4-ஆவது நாளாக வெள்ளிக்கிழமையும் அதிகரிக்கப்பட்டது. அதன்படி பெட்ரோல் விலை லிட்டருக்கு 25 காசுகளும், டீசல் விலை லிட்டருக்கு 30 காசுகளும் அதிகரிக்கப்பட்டுள்ளதாக எண்ணெய் நிறுவனங்கள் அறிவிக்கை வெளியிட்டன.

இந்த விலை உயா்வைத் தொடா்ந்து தில்லியில் ஒரு லிட்டா் பெட்ரோல் ரூ.91.27-க்கும், ஒரு லிட்டா் டீசல் ரூ. 81.73-க்கும் விற்பனை செய்யப்பட்டது. மும்பையில் ஒரு லிட்டா் பெட்ரோல் விலை ரூ.97.61-ஆகவும், ஒரு லிட்டா் டீசல் விலை ரூ.88.82-ஆகவும் இருந்தது. கொல்கத்தாவில் ஒரு லிட்டா் பெட்ரோல் விலை ரூ.91.41 ஆகவும், ஒரு லிட்டா் டீசல் விலை ரூ.84.57-ஆகவும் இருந்தது. சென்னையில் ஒரு லிட்டா் பெட்ரோல் ரூ.93.15-க்கும், ஒரு லிட்டா் டீசல் ரூ.86.65-க்கும் விற்பனையானது.

‘வாட்’ வரியை பொருத்து பெட்ரோல், டீசல் விலை ஒவ்வொரு மாநிலத்திலும் வேறுபடும். பெட்ரோலின் சில்லறை விற்பனை விலையில் 60 சதவீதமும், டீசலின் சில்லறை விற்பனை விலையில் 54 சதவீதத்துக்கு அதிகமாகவும் மத்திய, மாநில அரசுகள் விதித்துள்ள வரிகள் அடங்கியுள்ளன.