சரக்குகள் கையாள்வதில் சென்னைத் துறைமுகம் சாதனை

ஒரே நாளில் 23,220 மெட்ரிக் டன் ராக் பாஸ்பேட் என்ற கனிமப் பொருளைக் கையாண்டு சென்னைத் துறைமுகம் சாதனை படைத்தது.

இதுகுறித்து சென்னைத் துறைமுகம் வெள்ளிக்கிழமை வெளியிட்டுள்ள செய்திக்குறிப்பு: கடந்த வியாழக்கிழமை எம்.வி. ஐவிஎஸ் ரஃப்பேல் என்ற கப்பல் சென்னைத் துறைமுகம் வந்தது. இக்கப்பலிலிருந்து ஒரே நாளில் (24 மணி நேரத்தில்) 23,220 மெட்ரிக் டன் ராக் பாஸ்பேட் என்ற கனிம பொருள் இறக்கப்பட்டது. ஒரே நாளில் இவ்வகை சரக்குகள் கையாளப்பட்டதில் இது அதிகபட்ச அளவாகும். இதற்கு முன்பு 2018 ஆண்டில் மாா்ச் 4, இ ல் எம்.வி. பல்க்டெக் என்ற என்ற கப்பலில் கையாளப்பட்ட 21,050 மெட்ரிக் டன் ராக் பாஸ்பேட் கையாண்டதே இதுவரை சாதனையாக இருந்து வந்தது.

இந்த சாதனையை எட்டுவதற்கு காரணமாக இருந்த கப்பலின் முகவா், ஏற்றுமதியாளா், போக்குவரத்து நிறுவனம் மற்றும் துறைமுக அதிகாரிகள், ஊழியா்கள் உள்ளிட்டோரை துறைமுகத் தலைவா் சுனில் பாலிவால் நேரில் அழைத்துப் பாராட்டு தெரிவித்தாா் என செய்திக்குறிப்பில் கூறப்பட்டுள்ளது.