‘திமுகவின் ஆக்சிஜனுடன் காங். ஐசியூவில் இருக்கிறது’: அண்ணாமலை பதிலடி

திமுகவின் ஆக்சிஜன் உதவியுடன் ஐசியூவின் காங்கிரஸ் கட்சி இருப்பதாக தமிழக பாஜக தலைவர் அண்ணாமலை விமர்சனம் செய்துள்ளார்.

நாடாளுமன்ற பட்ஜெட் கூட்டத்தொடரில், தமிழகத்தை பாஜகவால் ஒருபோது ஆட்சி செய்ய முடியாது என காங்கிரஸ் முன்னாள் தலைவர் ராகுல் காந்தி நேற்று மாலை விமர்சனம் செய்திருந்தார்.

இந்நிலையில், ராகுல் காந்தியின் கருத்திற்கு பதிலளித்து அண்ணாமலை வெளியிட்ட டிவிட்டர் பதிவில்,

“ராகுல் காந்தி வழக்கம்போல் நாடாளுமன்றத்தில் பொங்கி எழுந்திருக்கிறார். தமிழகத்தை பாஜகவால் ஆட்சி செய்ய முடியாது எனக் கூறியிருக்கிறார்.

தமிழ்நாட்டை சில காலங்களுக்கு காங்கிரஸ் ஆட்சி செய்தது. அப்போது உங்கள் தாத்தா 1965-ம் ஆண்டு ஹிந்தி திணிப்புக்கு வழிவகை செய்தார். பின் 1986-ம் ஆண்டு உங்கள் தந்தையுன் அதை செய்தார். பின், காமராஜரை அவமதித்தீர்கள். உங்கள் பாட்டி 1974ஆம் ஆண்டு கச்சத்தீவை வெளிநாட்டுக்கு கொடுத்தார்.

இதையும் படிக்க | 'உங்களால் ஒருபோதும் தமிழ்நாட்டை ஆள முடியாது': பாஜகவை விளாசிய ராகுல்

 2009-ஐ நினைவுகூறுங்கள். இலங்கை தமிழர்களுக்கு நடந்த பிரச்னைகளுக்கு நீங்களே பொறுப்பு. எங்கள் பிரதமர்தான், அவர்களுக்காக 50,000 வீடுகளை கட்டிக்கொடுத்தார்.

இவற்றின் விளைவாக, தற்போது திமுகவின் ஆக்சிஜன் உதவியுடன் ஐ.சி.யூ.வில் இருக்கின்றீர்கள். புதுச்சேரியில் தற்போது நாங்கள் ஆட்சியிலும் இருக்கிறோம். பிரதமரின் தொலைநோக்கு பார்வையை ஏற்றுக்கொண்ட மக்களுக்கு நன்றி தெரிவிக்கிறேன். இதுவே எங்களின் மாபெரும் வெற்றிதான். அடுத்தது எங்களின் இலக்கு, தமிழகம்தான். தமிழக மக்கள் பாஜக மற்றும் பிரதமருடன் இருக்கின்றனர்."