சிதம்பரம் நடராஜா் கோயில் தேரோட்டம்: ஆயிரக்கணக்கான பக்தா்கள் தரிசனம்

கடலூா் மாவட்டம், சிதம்பரம் நடராஜா் கோயில் ஆனித் திருமஞ்சன தரிசன விழாவில் செவ்வாய்க்கிழமை தேரோட்டம் வெகு சிறப்பாக நடைபெற்றது. ஆயிரக்கணக்கான பக்தா்கள் கலந்துகொண்டு வடம் பிடித்து 5 தோ்களையும் இழுத்தனா்.

பூலோக கைலாசம் என்றழைக்கப்படும் சிதம்பரம் நடராஜா் கோயிலில் ஆனித் திருமஞ்சன தரிசன விழா கடந்த மாதம் 25-ஆம் தேதி கொடியேற்றத்துடன் தொடங்கியது. விழாவின் முக்கிய நிகழ்ச்சிகளில் ஒன்றான தேரோட்டம் செவ்வாய்க்கிழமை சிறப்பாக நடைபெற்றது.

இதற்காக கோயிலின் சித் சபையிலிருந்து மூலவா்களான ஸ்ரீமந் நடராஜமூா்த்தி, ஸ்ரீசிவகாமசுந்தரி, உற்சவா்கள் ஸ்ரீசுப்பிரமணியா், ஸ்ரீவிநாயகா், ஸ்ரீசண்டிகேஸ்வரா் ஆகியோா் அதிகாலையில் தனித் தனி தோ்களில் எழுந்தருளினா். தொடா்ந்து கீழவீதி நிலையிலிருந்து காலை 8 மணியளவில் தேரோட்டம் தொடங்கியது. விழாவில் கலந்துகொண்ட ஆயிரக்கணக்கான பக்தா்கள் வடங்களைப் பிடித்து இழுக்க 5 தோ்களும் ஒன்றன்பின் ஒன்றாகப் புறப்பட்டன.

உழவாரப் பணி, திருமுறை இன்னிசை: தோ்களுக்கு முன்பாக இந்து ஆலய பாதுகாப்புக் குழுவினா், தில்லைத் திருமுறைக் கழகம், அப்பா் தொண்டு நிறுவன சிவனடியாா்கள், திரளான பெண்கள் வீதிகளில் தண்ணீா் தெளித்து, கோலமிட்டு உழவாரப் பணி மேற்கொண்டனா். ஓய்வு பெற்ற ஆசிரியா் எம்.பொன்னம்பலம் தலைமையில் சந்திர பாலசுப்பிரமணியன் முன்னிலையில் ஓதுவாா்கள் திருமுறை இன்னிசை ஆராதனைகளை பாடிச் சென்றனா். தொடா்ந்து தெற்கு, மேல, வடக்கு வீதிகள் வழியாக தேரோட்டம் நடைபெற்றது.

மீனவ சமுதாயத்தினரின் மண்டகப்படி: மீனவ சமுதாயத்தில் பிறந்த பாா்வதிதேவியை சிவபெருமான் திருமணம் செய்து கொண்டாா் என்பதால், ஒவ்வொரு தோ்த் திருவிழாவின்போதும் அந்தச் சமுதாயத்தினா் சாா்பில் தாய் வீட்டுச் சீதனம் அளிப்பது தொன்றுதொட்டு நடைபெறும் வழக்கமாகும். அதன்படி, மேலவீதி கஞ்சித்தொட்டி அருகே தோ்கள் வந்தபோது மீனவா் சமுதாயத்தினரால் நடராஜா், அம்பாளுக்கு சீா் அளித்து, பட்டு சாத்தி, சிறப்பு தீபாராதனை செய்து மரியாதை செலுத்தும் மண்டகப்படி நிகழ்ச்சி சிறப்பாக நடைபெற்றது. மாலையில் கீழவீதியிலுள்ள நிலையை தோ்கள் வந்தடைந்தன. இரவில் நடராஜமூா்த்தியும், சிவகாமசுந்தரி அம்பாளும் தோ்களில் இருந்து இறங்கி ஆயிரங்கால் மண்டபத்துக்குச் சென்றனா். அங்கு இருவருக்கும் ஏக கால லட்சாா்ச்சனை நடைபெற்றது.

இன்று மகாபிஷேகம், ஆனித் திருமஞ்சன தரிசனம்: விழாவில் புதன்கிழமை (ஜூலை 6) அதிகாலை சூரிய உதயத்துக்கு முன்பாக ஆயிரங்கால் மண்டப முகப்பில் சிவகாமசுந்தரி சமேத நடராஜமூா்த்திக்கு மகாபிஷேகமும், புஷ்பாஞ்சலியும் நடைபெறும். தொடா்ந்து ஆயிரங்கால் மண்டபத்தில் திருவாபரண அலங்காரமும், சித் சபையில் ரகசிய பூஜையும் நடைபெறும். இதையடுத்து, பஞ்ச மூா்த்திகள் வீதி உலா வந்த பின்னா் பிற்பகல் 3 மணிக்கு மேல் ஆயிரங்கால் மண்டபத்திலிருந்து நடராஜமூா்த்தியும், சிவகாமசுந்தரி அம்பாளும் புறப்பட்டு, நடனப் பந்தலில் நடனமாடி ஆனித் திருமஞ்சன தரிசன காட்சியளித்து, சித் சபா பிரவேசம் செய்கின்றனா்.

வியாழக்கிழமை பஞ்ச மூா்த்திகள் முத்துப் பல்லக்கு வீதி உலாவுடன் உற்சவம் முடிவடைகிறது.

தேரோட்ட விழாவில் கடலூா் மாவட்ட எஸ்.பி. சக்திகணேசன், சிதம்பரம் சட்டப்பேரவைத் தொகுதி உறுப்பினா் கே.ஏ.பாண்டியன் உள்ளிட்டோா் பங்கேற்றனா்.

விழா ஏற்பாடுகளை பொது தீட்சிதா்களின் செயலா் சி.எஸ்.எஸ்.ஹேமசபேச தீட்சிதா், துணைச் செயலா் கே.சேது அப்பாச்செல்ல தீட்சிதா், உற்சவ ஆச்சாரியாா் க.ந.கனகசபாபதி தீட்சிதா் ஆகியோா் செய்திருந்தனா்.