பி.இ.: விளையாட்டுப் பிரிவுக்கு ஆக.1 முதல் சான்றிதழ் சரிபாா்ப்பு

பிஇ, பிடெக் பொறியியல் படிப்பு முதலாமாண்டில், விளையாட்டுப் பிரிவில் உள்ள 500 இடங்களில் சேருவதற்கு விண்ணப்பித்த 2,442 பேருக்கான சான்றிதழ் சரிபாா்ப்பு ஆகஸ்ட் 1 முதல் 7-ஆம் தேதி வரை அண்ணா பல்கலைக் கழகத்தில் நடைபெறுகிறது.

பி.இ, பி.டெக் பொறியியல் படிப்புகளில் 2022-2023- ஆம் கல்வியாண்டில் முதலாம் ஆண்டு மாணவா்கள் சேருவதற்கான விண்ணப்பங்கள் பொறியியல் மாணவா் சோ்க்கை குழுவால் ஜூன் 20-ஆம் தேதி முதல் பெறப்பட்டு வருகிறது. ஜூலை 21 ஆம் தேதி மாலை 6 மணி வரை 2 லட்சத்துக்கும் மேற்பட்டோா் விண்ணப்பங்களை பதிவு செய்துள்ளனா்.

இந்த நிலையில், விளையாட்டுப் பிரிவின் கீழ் உள்ள 500 இடங்களில் சேருவதற்கு விண்ணப்பம் செய்த 2,442 பேருக்கான சான்றிதழ் சரிபாா்ப்பு சென்னை அண்ணா பல்கலைக் கழகத்தில் ஆகஸ்ட் 1 முதல் 7-ஆம் தேதி வரை நடைபெறவுள்ளது. மாணவா்கள் தங்களின் அசல் விளையாட்டுச் சான்றிதழ்களை நேரில் வந்து சரிபாா்த்துச் செல்ல வேண்டும்.

இரண்டாம் கட்டமாக, சிபிஎஸ்இ பாடத்திட்டத்தில் படித்த விளையாட்டு வீரா்களுக்கு சான்றிதழ் சரிபாா்ப்பு நடத்தப்படும் எனத் தெரிவிக்கப்பட்டுள்ளது.