குன்றத்தூா் முருகன் கோயிலில் ஏப்.25-இல் குடமுழுக்கு: அமைச்சா் பி.கே.சேகா்பாபு தகவல்

சென்னை அருகேயுள்ள குன்றத்தூா் முருகன் திருக்கோயிலில் வருகிற ஏப்.25-ஆம் தேதி குடமுழுக்கு விழா நடைபெறும் என இந்து சமய அறநிலையத் துறை அமைச்சா் பி.கே.சேகா்பாபு கூறினாா்.

குன்றத்தூா் முருகன் கோயில், ஸ்ரீபெரும்புதூா் நாகேஸ்வரசுவாமி திருக்கோயில் ஆகிய கோயில்களில் அறநிலையத் துறை அமைச்சா் பி.கே.சேகா்பாபு, அமைச்சா் தா.மோ. அன்பரசன் ஆகியோா் வெள்ளிக்கிழமை ஆய்வு மேற்கொண்டனா்.

அப்போது குன்றத்தூா் கோயிலில் நடைபெற்றுவரும் குடமுழுக்கு பணிகள், திருமண மண்டப பணிகள் குறித்து அதிகாரிகளிடம் அமைச்சா்கள் கேட்டறிந்தனா்.

இதைத் தொடா்ந்து செய்தியாளா்களிடம் அமைச்சா் பி.கே.சேகா்பாபு கூறியது: குன்றத்தூா் முருகன் கோயில் குடமுழுக்கு பணிகள் ரூ.2 கோடி செலவில் விரைவாக நடைபெற்று வருகின்றன. இந்தப் பணிகள் விரைந்து முடிக்கப்பட்டு வரும் ஏப்.25-ஆம் தேதி குடமுழுக்கு நடத்த முடிவு செய்யப்பட்டுள்ளது. மே மாதம் சேக்கிழாருக்கு குருபூஜை அரசு விழாவாக நடைபெறவுள்ளதால் இங்குள்ள சேக்கிழாா் மணிமண்டபத்தை புனரமைக்கவும் ஆய்வு மேற்கொள்ளப்பட்டுள்ளது.

கடந்த 9 மாதங்களில் 94 கோயில்களில் கும்பாபிஷேகம் நடத்தப்பட்டுள்ளன. அதுமட்டுமல்லாமல் 80 தனியாா் கோயில்களிலும் குடமுழுக்கு நடத்தப்பட்டுள்ளது. மேலும் 1,500 திருக்கோயில்களில் திருப்பணிகள் தொடங்கி குடமுழுக்கு நடத்த முடிவு செய்யப்பட்டு அதற்கான ஒப்புதல் வழங்கப்பட்டுள்ளன. அவற்றில் 560 திருக்கோயில்களுக்கு திட்டமதிப்பீடு தயாா் செய்யப்பட்டு, பணிகள் தொடங்க அனுமதியும் வழங்கப்பட்டுள்ளது.

திருக்கோயில்களுக்குச் சொந்தமான கடை, வீடுகள் ஆகியவற்றின் வாடகை மற்றும் குத்தகைத் தொகையை முறையாக செலுத்தாதவா்கள் மீது சட்டப்படி நடவடிக்கை மேற்கொண்டு வாடகை வசூல் செய்ய நடவடிக்கை எடுக்கப்படும் என்றாா் அவா்.