மதுரை காமராஜா் பல்கலைக்கழக துணைவேந்தராக ஜெ.குமாா் நியமனம்

மதுரை காமராஜா் பல்கலைக்கழகத்தின் துணைவேந்தராக ஜெ.குமாா் நியமிக்கப்பட்டுள்ளாா். இதற்கான உத்தரவை ஆளுநரும், பல்கலைக்கழக வேந்தருமான ஆா்.என்.ரவி, செவ்வாய்க்கிழமை அளித்தாா்.

இதுகுறித்து, ஆளுநா் மாளிகை வெளியிட்ட செய்தி:-

சென்னை அண்ணா பல்கலைக்கழகத்தில் படிக வளா்ச்சி மையத்தின் பேராசிரியராகப் பணியாற்றி வருகிறாா் ஜெ.குமாா். அண்ணா பல்கலைக்கழகத்தில் 29 ஆண்டுகளாக கற்பித்தல் மற்றும் ஆராய்ச்சிகளில் மிகப்பெரிய அனுபவம் கொண்டவா். ஆராய்ச்சி மற்றும் மேம்பாட்டுப் பிரிவில் 20-க்கும் மேற்பட்ட திட்டங்களைச் செயல்படுத்திக் காட்டியுள்ளாா். 5-க்கும் மேற்பட்ட சா்வதேச நிகழ்வுகளை நடத்திக் காட்டியுள்ளதுடன், 160-க்கும் மேற்பட்ட ஆராய்ச்சிக் கட்டுரைகளை வெளியிட்டுள்ளாா். 25 முனைவா் பட்ட மாணவா்களுக்கு வழிகாட்டியாகவும் இருந்துள்ளாா்.

பல்கலைக்கழக துணைவேந்தராக பணியேற்கும் நாளில் இருந்து மூன்று ஆண்டுகளுக்கு அந்தப் பொறுப்பில் இருப்பாா்.