தேர்தல் அறிக்கையிலிருந்து திமுக நழுவுகிறது: ஓபிஎஸ் (விடியோ)

தேர்தல் அறிக்கையில் இருந்து திமுக நழுவுவதாக அதிமுக ஒருங்கிணைப்பாளர் ஓ.பன்னீர் செல்வம் தெரிவித்துள்ளார். 

அதிமுக ஒருங்கிணைப்பாளரும் எதிர்க்கட்சி துணைத்தலைவருமான ஓ.பன்னீர்செல்வம் சட்டப்பேரவை மானியக் கோரிக்கை விவாத நிகழ்வுகள் நிறைவடைந்த நிலையில், தேனி மாவட்டத்திற்குச் செல்வதற்காக சென்னையிலிருந்து விமானம் மூலம் மதுரை வந்தடைந்தார்.

பின்னர் ஓ.பன்னீர்செல்வம் செய்தியாளர்களின் கேள்விகளுக்கு பதில் அளித்தார். அப்போது, பழைய ஓய்வூதியத் திட்டம் அமல்படுத்துவதில் சிக்கல் என நிதியமைச்சர் பேசியது குறித்த கேள்விக்கு,

தேர்தல் வாக்குறுதியில் பழைய ஓய்வூதியத் திட்டம் நடைமுறைப்படுத்தப்படும் என தெரிவித்த நிலையில், அதிலிருந்து திமுக நழுவிக்கொண்டுள்ளனர். பழைய ஒய்வூதியத் திட்டம் குறித்து திமுகவிடம்தான் கருத்துக் கேட்க வேண்டும் என்றார். 

மேலும், மானியக் கோரிக்கையின்போது அறிவிக்கப்பட்ட திட்டங்களை திமுக நடைமுறைப்படுத்துமா என்ற கேள்விக்கு, 'ஏற்கனவே அறிவிக்கப்பட்ட தேர்தல் வாக்குறுதிகளை திமுக நிறைவேற்ற வேண்டும். ஏற்கனவே அறிவிக்கப்பட்ட தேர்தல் வாக்குறுதிகளை நிறைவேற்ற முடியாத திமுக அரசு புதிய திட்டங்களை எவ்வாறு செயல்படுத்தப்போகிறது' என்று பதில் அளித்தார்.