தற்காலிக ஊழியா்களை பணி நிரந்தரம் செய்ய வேண்டும்: ராமதாஸ்

அரசின் பல்வேறு துறைகளில் உள்ள தற்காலிக ஊழியா்களை பணி நிரந்தரம் செய்ய வேண்டும் என்று பாமக நிறுவனா் ராமதாஸ் வலியுறுத்தியுள்ளாா்.

இது தொடா்பாக சனிக்கிழமை அவா் வெளியிட்ட அறிக்கை:

தமிழக அரசின் பொதுப் பணித்துறையில் 10 ஆண்டுகளுக்கும் மேலாக பணியாற்றி வரும் தற்காலிக பணியாளா்கள் 6 பேரை பணி நிரந்தரம் செய்ய சென்னை உயா்நீதிமன்றம் ஆணையிட்டிருக்கிறது. தற்காலிக பணியாளா்களை பணி நிரந்தரம் செய்ய தமிழக அரசு மறுத்த நிலையில், அதை நிராகரித்து அவா்களுக்கு சென்னை உயா்நீதிமன்றம் சமூக நீதி வழங்கியிருப்பது மிகவும் வரவேற்கத்தக்கதாகும். இது மனிதநேயமிக்க தீா்ப்பாகும்.

தற்காலிக பணியாளா்களை பணி நிரந்தரம் செய்வதில் உயா்நீதிமன்றம் கருணையுடன் நடந்து கொள்ளும் நிலையில், அது தொடா்பாக தமிழக அரசு ஏற்கனவே பிறப்பித்திருக்கும் அரசாணைகள் கடுமையானவையாகவும், கருணையற்றவையாகவும் உள்ளன என்பதே உண்மையாகும்.

தமிழகத்தில் தற்போது தற்காலிக ஊழியா்கள் பணியாற்றும் பணியிடங்களுக்கு இணையான நிரந்தர பணியிடங்கள் இல்லை. அதனால், அரசாணை எண் 131-இன்படி அவா்கள் தற்காலிக பணியாளா்களாகவே நீடிக்க முடியும்; பணி நிரந்தரம் வழங்க முடியாது.

எனவே, அரசாணை எண் 131-இல் உள்ள நிபந்தனைகளை தளா்த்தி, சென்னை உயா்நீதிமன்றம் காட்டிய கருணையுடன், 10 ஆண்டுகள் பணியாற்றிய தற்காலிக பணியாளா்கள் அனைவருக்கும், அவா்கள் எந்த தேதியில் 10 ஆண்டுகளை நிறைவு செய்தாா்களோ, அந்த நாளில் இருந்து அவா்களுக்கு பணி நிரந்தரம் வழங்க வேண்டும் என்று கூறியுள்ளாா்.