மின் கட்டண உயர்வு: மேட்டூரில் அதிமுக ஆர்ப்பாட்டம்

மேட்டூர்: சேலம் மாவட்டம் மேட்டூரில் மின் கட்டண உயர்வைக் கண்டித்தும், மின் கட்டண உயர்வை திரும்பப் பெற வலியுறுத்தியும் அதிமுக சார்பில்  கண்டன ஆர்ப்பாட்டம் நடைபெற்றது.

மின்கட்டண உயர்வைக் கண்டித்து தமிழகம் முழுவதும் அதிமுக சார்பில் கண்டன ஆர்ப்பாட்டம் நடைபெறும் என்று தமிழக சட்டபேரவை எதிர்க்கட்சி தலைவரும்,அதிமுக இடைக்கால பொதுச் செயலாளருமான எடப்பாடி கே. பழனிசாமி அறிவித்திருந்தார். 

அதன்படி மேட்டூர் சதுரங்காடியில் இன்று காலை 11 மணிக்கு  தமிழக அரசின் மின் கட்டண உயர்வைக் கண்டித்து, கட்டண உயர்வைத் திரும்பப் பெற வலியுறுத்தியும் ஆர்ப்பாட்டம் நடத்தப்பட்டது. 

இந்த ஆர்ப்பாட்டத்திற்கு சேலம் புறநகர் மாவட்ட அதிமுக செயலாளர் ஆர். இளங்கோவன் தலைமை வகித்தார். மாநிலங்களவை உறுப்பினர் என். சந்திரசேகரன் வரவேற்புரை ஆற்றினார்.

முன்னாள் சட்டப்பேரவை உறுப்பினரும், அதிமுக அமைப்புச் செயலாளருமான எஸ். செம்மலை கண்டன உரையாற்றினார்.

இந்த ஆர்ப்பாட்டத்தில் சட்டப்பேரவை உறுப்பினர்கள் மணி (ஒமலூர்), ராஜமுத்து (வீரபாண்டி), ஜெய்சங்கரன் (ஆத்தூர்), சுந்தர்ராஜன் (சங்ககிரி), சித்ரா (ஏற்காடு), நல்லதம்பி (கெங்கவல்லி), ஒன்றியச் செயலாளர்கள், நகரச் செயலாளர்கள், உள்ளாட்சி மன்ற நிர்வாகிகள், கூட்டுறவு சங்க நிர்வாகிகள், மாவட்ட கழக நிர்வாகிகள், சார்பு அணி நிர்வாகிகள், கிளை கழக நிர்வாகிகள், பொதுமக்கள், சிறுகுறு வியாபாரிகள் என ஆயிரத்திற்கும் மேற்பட்டோர் கலந்து கொண்டனர்.

இதையும் படிக்க | மின்கட்டண உயர்வு: தமிழகம் முழுவதும் அதிமுக ஆர்ப்பாட்டம்!