தமிழகத்துக்கு இயற்கையாகவே செஸ் விளையாட்டுடன் தொடா்பு இருப்பதாக பிரதமா் நரேந்திர மோடி பெருமிதத்துடன் தெரிவித்தாா்.
தமிழகத்தில் செஸ் விளையாட்டு தொடா்பான தனித்துவமான கோயில் இருப்பது குறித்தும் அவா் குறிப்பிட்டாா்.
சென்னையை அடுத்த மாமல்லபுரத்தில் 44-ஆவது செஸ் ஒலிம்பியாட் போட்டிகள் நடைபெறுகின்றன. விழா சென்னை நேரு உள்விளையாட்டரங்கில் வியாழக்கிழமை நடைபெற்ற விழாவில் செஸ் ஒலிம்பியாட்டை பிரதமா் நரேந்திர மோடி தொடக்கி வைத்தாா்.
முன்னதாக, நாட்டின் 75 நகரங்களுக்கு எடுத்துச் செல்லப்பட்டு சென்னை கொண்டுவரப்பட்ட செஸ் ஒலிம்பியாட் ஜோதியை பிரதமா் நரேந்திர மோடி, முதல்வா் மு.க.ஸ்டாலின் ஆகியோரிடம் இந்திய கிராண்ட் மாஸ்டா் விஸ்வநாதன் ஆனந்த் வழங்கினாா்.
இதைத் தொடா்ந்து, செஸ் ஒலிம்பியாட் ஜோதி, தமிழக செஸ் வீரா்கள் பிரக்ஞானந்தா, விஜயலட்சுமி, குகேஷ் ஆகியோரிடம் வழங்கப்பட்டது.
பின்னா், பிரதமா் மோடி பேசியதாவது: செஸ் போட்டிகளில் மிகவும் பெருமைமிக்க செஸ் ஒலிம்பியாட் இந்தியாவில் நடைபெறுகிறது. செஸ் விளையாட்டின் தாய்நாடான நமது நாட்டுக்கு ஒலிம்பியாட் வந்துள்ளது.
நிகழாண்டில் 75-ஆவது ஆண்டு சுதந்திர தினத்தைக் கொண்டாடுகிறோம். இந்தத் தருணத்தில், செஸ் ஒலிம்பியாட் போட்டியை நடத்த மிகக் குறைந்த நேரமே இருந்தாலும், மிகச்சிறப்பான ஏற்பாடுகள் செய்யப்பட்டுள்ளன.
திருவள்ளுவா் கூறியது போல்... விருந்தினா்களை கடவுளுக்கு இணையாகப் பாவிப்பதை இந்தியா்கள் கடைப்பிடித்து வருகிறாா்கள். ஈராயிரம் ஆண்டுகளுக்கு முன்பாக திருவள்ளுவரும் இதையே கூறியுள்ளாா். ‘இருந்தோம்பி இல்வாழ்வ தெல்லாம் விருந்தோம்பி வேளாண்மை செய்தற் பொருட்டு’ என வள்ளுவா் குறிப்பிட்டுள்ளாா்.
ஒட்டுமொத்த வாழ்வும், நாம் சம்பாதிப்பதும் நமது இல்லத்துக்கு வரும் விருந்தினா்களை உபசரிக்கத்தான் என வள்ளுவா் வலியுறுத்துகிறாா்.
இத்தகைய சிறப்பு கொண்ட இந்தியாவுக்கு பல்வேறு நாடுகளைச் சோ்ந்த வீரா்கள் வந்துள்ளனா்.
44-ஆவது செஸ் ஒலிம்பியாட் பல சிறப்புகளையும், முதன்மைகளையும், சாதனைகளையும் உள்ளடக்கியது. செஸ் ஒலிம்பியாட் போட்டி செஸ் எங்கு தோன்றியதோ அங்கேயே நடக்கிறது. ஆசியாவில் 30 ஆண்டுகளுக்குப் பிறகு இப்போது நடக்கவுள்ளது. அதிகளவு போட்டியாளா்களும், குழுக்களும், அதிக பெண் போட்டியாளா்கள் நிறைந்ததாகவும் இந்த செஸ் ஒலிம்பியாட் அமைந்துள்ளது.
செஸ் ஒலிம்பியாட் போட்டிக்காக ஜோதி ஓட்டம் முதல் முறையாக நடத்தப்பட்டது. 75 முக்கிய நகரங்களில் 27,000 கி.மீ. தொலைவுக்கு ஜோதி பயணித்தது. செஸ் எனும் விளையாட்டு தொடா்பான விழிப்புணா்வை இளைஞா்களின் மனதில் ஏற்படுத்த இந்த ஜோதி எடுத்துச் செல்லப்பட்டது. இது பெருமைதரத்தக்கது. ஒவ்வோா் இந்தியரின் சாா்பிலும் சா்வதேச செஸ் கூட்டமைப்புக்கு நன்றியைத் தெரிவித்துக் கொள்கிறேன்.
தமிழகத்தின் சிறப்பு: தமிழகத்தில் பல்வேறு கோயில்களும், சிற்பங்களும் உள்ளன. இங்குள்ள அழகான வேலைப்பாடுகளைக் கொண்ட சிற்பங்கள் மாநிலத்தில் உள்ள பல்வேறு வகையான விளையாட்டுகளைப் பிரதிபதிலிக்கின்றன.
தமிழகத்தில் செஸ் போட்டிக்கென தனித்துவமான கோயில் இருப்பது சிறப்பம்சம். திருவாரூா் மாவட்டம் திருப்பூவனூரில் இந்தக் கோயில் அமைந்திருக்கிறது. கடவுள் தனது இளவரசியுடன் செஸ் விளையாடியுள்ளாா். இயற்கையாகவே தமிழகம் செஸ் விளையாட்டுடன் தொடா்பை கொண்டிருப்பது இதுபோன்ற வலிமையான சான்றுகள் மூலம் தெரிய வருகிறது.
தமிழகம் பல கிராண்ட் மாஸ்டா்களை உருவாக்கியுள்ளது. இந்த மாநிலம் தனித்துவமான கலாசாரம், பழைமையான மொழியைக் கொண்டிருக்கிறது.
சென்னை, மாமல்லபுரம் மற்றும் அதனைச் சுற்றியுள்ள இடங்களில் பல விஷயங்களை சுற்றிப் பாா்த்து கண்டறிய முடியும்.
விளையாட்டு மக்களையும், சமுதாயத்தையும் இணைக்கிறது. குழு மனப்பான்மையை ஊக்குவிக்கிறது.
வரலாற்றில் இதுவரை இல்லாத நோய்த்தொற்றை இரண்டு ஆண்டுகளுக்கு முன்பு எதிா்கொண்டோம். அதற்குப் பிறகு, இப்போதுதான் பல்வேறு விளையாட்டுப் போட்டிகள் நடைபெறுகின்றன. இந்தப் போட்டிகளை நாம் ஊக்கம், உற்சாகத்துடன் எதிா்கொள்கிறோம். அதே உற்சாகத்தை இங்கு காண்கிறேன்.
இந்தியாவில் விளையாட்டுக்கான சிறப்பான தருணம் என்பது இப்போதுதான். ஒலிம்பிக்ஸ், பாரா ஒலிம்பிக்ஸ் என அனைத்திலும் சிறப்பான சாதனைகளை இந்தியா படைத்து வருகிறது. இளைஞா்கள் விளையாட்டை தங்களது துறையாகத் தோ்ந்தெடுக்கும் சிறப்பான நிலை இப்போது ஏற்பட்டுள்ளது. இதற்கு இரண்டு காரணிகள். ஒன்று இளைஞா்களின் சக்தி, மற்றொன்று விளையாட்டுத் துறையில் நிகழும் சிறப்பான சூழ்நிலை.
சிறு நகரங்களில் உள்ள இளைஞா்கள்கூட பல்வேறு போட்டிகளில் பங்கேற்று நாட்டுக்குப் பெருமை தேடித் தருகிறாா்கள். விளையாட்டுத் துறையில் ஏற்படும் புரட்சியில் பெண்கள் தலைமை வகிக்கிறாா்கள். விளையாட்டுத் துறையில் ஏற்படுத்தப்பட்டுள்ள உட்கட்டமைப்பு, ஊக்கமளிப்பு ஆகியவற்றால் இவை சாத்தியமாகின.
விளையாட்டில் யாருமே தோல்வி அடைந்தவா்கள் இல்லை. வெற்றி பெற்றவா்கள் இருப்பாா்கள். எதிா்காலத்தில் வெற்றி பெறுபவா்கள் இருப்பா். இந்த இரண்டைத் தவிர வேறு யாரும் கிடையாது என்று பிரதமா் பேசினாா்.
இந்த விழாவில், ஆளுநா் ஆா்.என்.ரவி பங்கேற்றாா். மத்திய செய்தி, ஒலிபரப்பு மற்றும் விளையாட்டுத் துறை அமைச்சா் அனுராக் சிங் தாகுா், மத்திய செய்தி-ஒலிபரப்பு, மீன்வளம், கால்நடை மற்றும் பால்வளத் துறை இணையமைச்சா் எல்.முருகன் ஆகியோா் பேசினா்.
தமிழக அரசின் விளையாட்டு மேம்பாட்டுத் துறை அமைச்சா் சிவ.வீ.மெய்யநாதன் வரவேற்றாா்.