அரசு விரைவு போக்குவரத்துக் கழகத்துக்கு 150 அதிநவீன பேருந்துகள்: அமைச்சா் உதயநிதி ஸ்டாலின் தொடங்கி வைத்தாா்

தமிழக அரசு விரைவு போக்குவரத்துக் கழகத்துக்காக ரூ.90.52 கோடியில் கொள்முதல் செய்யப்பட்ட 150 அதிநவீன வசதிகள் கொண்ட புதிய பேருந்துகளின் சேவையை இளைஞா் நலன் மற்றும் விளையாட்டுத் துறை அமைச்சா் உதயநிதி ஸ்டாலின் புதன்கிழமை தொடங்கிவைத்தாா்.

அரசு விரைவுப் போக்குவரத்துக் கழகத்துக்கு நவீன தொழில்நுட்பத்துடன் கூடிய இருக்கை மற்றும் படுக்கை வசதி கொண்ட 200 புதிய பேருந்துகள் கொள்முதல் செய்ய முடிவு செய்யப்பட்டுள்ளது. இதில் முதல் கட்டமாக ‘பிஎஸ் 6’ வகையைச் சோ்ந்த 150 அதிநவீன பேருந்துகள் ரூ.90.52 கோடி மதிப்பிலான வாங்கப்பட்டுள்ளன.

இப்பேருந்துகளை பொதுமக்கள் பயன்பாட்டுக்காக தொடங்கி வைக்கும் நிகழ்ச்சி சென்னை, பல்லவன் சாலையில் உள்ள மாநகர போக்குவரத்துக் கழக மத்திய பணிமனையில் புதன்கிழமை நடைபெற்றது. இதில் அமைச்சா் உதயநிதி ஸ்டாலின் கலந்து கொண்டு பேருந்துகளை கொடியசைத்து தொடங்கி வைத்தாா். தொடா்ந்து, பேருந்தில் ஏறி, அதன் சிறப்பம்சங்களையும் பாா்வையிட்டாா்.

நிகழ்ச்சியில், போக்குவரத்துத் துறை அமைச்சா் சா.சி.சிவசங்கா், இந்து சமய அறநிலையத் துறை அமைச்சா் பி.கே.சேகா்பாபு, மக்களவை உறுப்பினா்தயாநிதிமாறன், தொமுச பேரவை பொதுச்செயலரும் எம்.பி.யுமான மு.சண்முகம், மேயா் ஆா்.பிரியா, துணை மேயா் மு.மகேஷ்குமாா், போக்குவரத்து துறைச் செயலா் க.பணீந்திர ரெட்டி, மாநகர போக்குவரத்துக் கழக மேலாண் இயக்குநா் ஆல்பி ஜான் வா்கீஸ், விரைவுப் போக்குவரத்துக் கழக மேலாண் இயக்குநா் ஆா்.மோகன், மாநகா் போக்குவரத்துக் கழக இணை மேலாண் இயக்குநா் செ.நடராஜன், தொமுச பேரவை பொருளாளா் கி.நடராஜன் உள்ளிட்டோா் பங்கேற்றனா்.

சிறப்பம்சங்கள்: இந்தியாவிலேயே முதல் முறையாக அரசு விரைவுப் போக்குவரத்துக் கழகத்தில் பயணிகளின் சொகுசு பயணத்துக்காக இந்த புதிய பேருந்தின் முன்புறத்தில் ‘ஏா் சஸ்பென்சன்’ வசதி செய்யப்பட்டுள்ளது. முதியோா், குழந்தைகளின் வசதிக்காக 50 பேருந்துகளில், கீழ் பகுதியிலும் படுக்கை வசதி செய்யப்பட்டுள்ளது. படுக்கைகள் அதிகமான இடவசதி, இரு படுக்கைகளுக்கு இடையே தடுப்பும் ஏற்படுத்தப்பட்டுள்ளது.

ஒவ்வொரு இருக்கை மற்றும் படுக்கைக்கும் தனித்தனியாக கைப்பேசி சாா்ஜிங் போா்டு, மின்விசிறிகள் பொருத்தப்பட்டுள்ளன. அவசர காலங்களில் பயணிகளை எச்சரிக்கும் வகையில் ஓட்டுநா் இருக்கைக்கு அருகில் அபாய ஒலி எழுப்பும் கருவியும், பயணிகளுக்கு தகவல் தெரிவிக்கும் வகையில் ஒலி வாங்கியும் அமைக்கப்பட்டுள்ளன. பேருந்தின் கடைசி இருக்கையின் அருகில் ஒரு அவசரகால கதவும், பேருந்தின் பக்கவாட்டில் பயணிகளின் உடைமைகள் மற்றும் சரக்குகளை கையாள போதிய இட வசதியும் செய்யப்பட்டுள்ளது. காற்று மாசுபாட்டைக் குறைக்கும் வகையில் பேருந்து என்ஜின் வடிவமைக்கப்பட்டுள்ளது. என்ஜின் பகுதியில் ஒருவேளை தீ பற்றுமானால், அதை முன் கூட்டியே திறம்பட அனுமானித்து அணைக்கும் ‘எப்டிஎஸ்எஸ்’ தானியங்கி கருவியும் பொருத்தப்பட்டுள்ளது. டிஜிட்டல் கடிகாரம் போன்றவையும் இடம்பெற்றுள்ளன.