கோவை: பாரதிய ஜனதா போன்ற சில்லறை கட்சிகளுக்கு எல்லாம் பதிலளிக்க முடியாது என்று தமிழக தொழில்துறை அமைச்சர் டிஆர்பி ராஜா தெரிவித்துள்ளார்.
கோவை மக்களவைத் தொகுதி திமுக வேட்பாளர் அறிமுக கூட்டத்தில் மாநில தொழில்துறை அமைச்சர் டிஆர்பி ராஜா கலந்து கொண்டார்.
இதனைத் தொடர்ந்து செய்தியாளர்களுடன் பேசியதாவது:
“கோவையில் மகத்தான வெற்றியை திமுக உதயசூரியன் பெறும். எதிர்த்து போட்டியிடுபவர்கள் டெபாசிட் இழப்பார்கள். அதிமுக போன்ற பிரதான கட்சிகளின் கேள்விகளுக்கும், விமர்சனத்துக்கும் மட்டுமே பதில் சொல்வேன். பாஜக போன்ற சில்லரைக் கட்சிகளுக்கு எல்லாம் பதில் சொல்ல முடியாது.
களத்தில் எதிர்க்கட்சியாக இருக்கும் அதிமுகவை வீழ்த்துவதற்கான வியூகங்கள் வகுக்கப்பட்டுள்ளது. பாஜக போன்ற கட்சிகளுக்கு முக்கியத்துவம் அளித்தால் கவனச் சிதறல் ஏற்படும்.” எனத் தெரிவித்தார்.
கோவை மக்களவைத் தொகுதியில் போட்டியிடும் திமுக வேட்பாளர் கணபதி ராஜ்குமாரை எதிர்த்து பாஜகவின் மாநில தலைவர் அண்ணாமலை போட்டியிடுவது குறிப்பிடத்தக்கது.
