முதல்வர் மு.க. ஸ்டாலினைச் சந்திக்கிறாரா பொன்முடி?

பெண்கள் பற்றி ஆபாசமாகப் பேசியதற்கு கட்சிப் பொறுப்பில் இருந்து விடுவிக்கப்பட்ட பொன்முடி, முதல்வர் மு.க. ஸ்டாலினைச் சந்திக்கவிருப்பதாகத் தகவல்கள் தெரிவிக்கின்றன.

கடந்த ஏப். 6 ஆம் தேதி பொதுக்கூட்டம் ஒன்றில் கலந்துகொண்டு பேசிய அமைச்சர் பொன்முடி, விலைமாது என்று குறிப்பிட்டு பெண்கள் பற்றி கொச்சையான கருத்துகளைக் கூறியிருந்தார். அவர் பேசிய விடியோ சமூக ஊடகங்களில் வைரலான நிலையில் கடும் கண்டனம் எழுந்துள்ளன. திமுக எம்.பி. கனிமொழியும் பொன்முடியின் பேச்சுக்கு கடும் கண்டனம் தெரிவித்திருந்தார்.

இந்த நிலையில் திமுகவின் துணைப் பொதுச் செயலாளர் பதவியில் இருந்து பொன்முடி விடுவிக்கப்படுவதாக கட்சியின் தலைவரும் முதல்வருமான மு.க.ஸ்டாலின் அறிவித்துள்ளார். அவருக்குப் பதிலாக எம்.பி. திருச்சி சிவா நியமிக்கப்பட்டுள்ளார்.

இதையும் படிக்க | பொன்முடிக்கு பதிலாக, திமுக துணைப் பொதுச் செயலாளராக திருச்சி சிவா நியமனம்!

மேலும், பொன்முடி விவகாரம் குறித்து முதல்வர் மு.க. ஸ்டாலின் இன்று காலை கட்சியின் முக்கிய பிரதிநிதிகளுடன் ஆலோசனை மேற்கொண்டதாகத் தெரிகிறது.

இதனைத் தொடர்ந்து பொன்முடி, முதல்வர் மு.க. ஸ்டாலினைச் சந்திக்கவிருப்பதாக தகவல்கள் தெரிவிக்கின்றன.

பொன்முடியின் கட்சி பதவி பறிப்பு கட்சியின் மூத்த தலைவர்களிடையே சற்று அதிர்வலைகளை ஏற்படுத்தியுள்ளது.

இதையும் படிக்க | அமைச்சர் பொன்முடியின் கட்சிப் பதவி பறிப்பு!