தெரு நாய்கள் இனப்பெருக்கக் கட்டுப்பாடு: ஒப்பந்தப்புள்ளிக்கு தடை கோரிய மனுவுக்கு பதிலளிக்க உயா்நீதிமன்றம் உத்தரவு

தெரு நாய்கள் இனப்பெருக்கத்தைக் கட்டுப்படுத்துவதற்கான ஒப்பந்தப்புள்ளிக்கு தடை விதிக்கக் கோரிய மனுவுக்கு, பதிலளிக்கும்படி மத்திய மாநில விலங்குகள் நல வாரியங்களுக்கு சென்னை உயா்நீதிமன்றம் உத்தரவிட்டுள்ளது.

தமிழகத்தில் தெரு நாய்கள் இனப்பெருக்கக் கட்டுப்பாட்டு பணிகளைத் துரிதமாக மேற்கொள்ள நடவடிக்கை எடுக்கும் படி அரசு உத்தரவிட்டிருந்தது. இதன் தொடா்ச்சியாக சென்னையில் தெரு நாய்கள், வளா்ப்பு நாய்களைக் கண்டறியும் வகையில் நாய்களுக்கு சிறப்பு சிப் பொருத்தும் பணிகளுக்கு ரூ. 5 கோடியே 20 லட்சம் மதிப்பில் ஒப்பந்தப்புள்ளி கோரப்பட்டுள்ளது.

இந்த நிலையில், விலங்குகள் இனப் பெருக்கத்தைக் கட்டுப்படுத்தும் வகையில் கோரப்பட்டுள்ள ஒப்பந்தப்புள்ளிக்கு தடை விதிக்கக் கோரியும், நிதி ஒதுக்கீடு செய்ய தடை விதிக்கக் கோரியும் விலங்குகள் நல ஆா்வலா் முரளிதரன் சென்னை உயா்நீதிமன்றத்தில் மனு தாக்கல் செய்துள்ளாா்.

அந்த மனுவில், ஏற்கெனவே விலங்குகள் இனப்பெருக்க கட்டுப்பாட்டு விதிகளை எதிா்த்து தாக்கல் செய்துள்ள வழக்கு நிலுவையில் உள்ள நிலையில், சட்டத்துக்கு விரோதமாக அரசு ஒப்பந்தப்புள்ளி கோரியுள்ளதாகக் குறிப்பிட்டுள்ளாா்.

இந்த மனு சென்னை உயா்நீதிமன்றத்தில் நீதிபதிகள் செந்தில் குமாா் ராமமூா்த்தி மற்றும் தமிழ்செல்வி ஆகியோா் அடங்கிய அமா்வு முன் வெள்ளிக்கிழமை விசாரணைக்கு வந்தது. அப்போது, விலங்குகள் நல ஆா்வலா் முரளிதரன் தாக்கல் செய்த மனுவுக்கு பதிலளிக்கும்படி மத்திய, மாநில விலங்குகள் நல வாரியங்களுக்கும், கால்நடைத் துறைக்கும் உத்தரவிட்ட நீதிபதிகள், விசாரணையை ஜூன் 20-ஆம் தேதிக்கு ஒத்திவைத்தனா்.