கரும்பு தோட்ட மின் வேலியில் சிக்கி காட்டு மாடு பலி: ஒருவா் கைது

தென்காசி மாவட்டம், புளியங்குடி அருகே மின்வேலியில் சிக்கி காட்டு மாடு இறந்தது தொடா்பாக ஒருவரை வனத்துறையினா் ஞாயிற்றுக்கிழமை கைது செய்தனா்.

புளியங்குடி, சிந்தாமணியைச் சோ்ந்தவா் சுந்தர்ராஜ் (66). இவருக்கு கோட்டைமலை மணத்தேரி பகுதியில் விவசாய நிலம் உள்ளது. இந்த நிலத்தில் கரும்பு பயிரிட்டுள்ள அவா், நிலத்தைச் சுற்றிலும் அனுமதியின்றி மின்வேலி அமைத்திருந்ததாகக் கூறப்படுகிறது.

கடந்த இரண்டு தினங்களுக்கு முன் இந்த மின் வேலியில் சிக்கி காட்டுமாடு இறந்ததாம். அதை யாருக்கும் தெரியாமல் சுந்தர்ராஜ் புதைத்துவிட்டாராம்.

தகவலறிந்த தென்காசி மாவட்ட வனத் துறையினா் சம்பவ இடத்துக்குச் சென்று புதைக்கப்பட்ட மாட்டை தோண்டி எடுத்து உடல் கூறாய்வு செய்து மீண்டும் புதைத்தனா்.

இதுகுறித்து புளியங்குடி வனத் துறையினா் வழக்குப் பதிந்து, சுந்தர்ராஜை கைது செய்தனா். மின்வாரியத்தினரும் விசாரணை மேற்கொண்டு வருகின்றனா்.