கோயிலை இடித்து சேதப்படுத்தியோா் மீது நடவடிக்கை கோரி ஆட்சியா் அலுவலகம் முற்றுகை

திருவள்ளூா் அருகே கோயிலை இடித்து சேதப்படுத்தியோா் மீது நடவடிக்கை கோரி கிராம பொதுமக்கள் ஆட்சியா் அலுவலகத்தை முற்றுகையிட்டனா்.

திருவள்ளூா் அடுத்த அரும்பாக்கம் கிராமத்தில் 300-க்கும் மேற்பட்ட பொதுமக்கள் மாரியம்மன் கோயிலில் வழிபாடு செய்து வருகின்றனா். இந்த நிலையில் கடந்த சில நாள்களுக்கு முன்பு கோயிலை மா்ம நபா்கள் சிலா் இடித்து சேதப்படுத்தி உள்ளனா். இதுகுறித்து அரும்பாக்கத்தை சோ்ந்த பொதுமக்கள் வட்டாட்சியா் மற்றும் அதிகாரிகளிடம் புகாா் மனு அளித்தும் நடவடிக்கை எடுக்கப்படவில்லை என கூறப்படுகிறது.

இதுகுறித்து பாதிக்கப்பட்டவா்கள் வெங்கல் காவல் நிலையத்தில் புகாா் அளித்தும், போலீஸாா் வழக்குப் பதிவு செய்யாமல் மெத்தனமாக இருந்து வத்தனா். புகாா் அளித்தவா்களை, எதிா் தரப்பினா் தொடா்ந்து மிரட்டி வருவதாகவும் கூறப்படுகிறது.

இந்த நிலையில் அரும்பாக்கம் பகுதி பொதுமக்கள் திருவள்ளூா் ஆட்சியா் அலுவலகத்தை வெள்ளிக்கிழமை முற்றுகையிட்டனா். அப்போது, 60 ஆண்டுகளாக வழிபட்டு வந்த மாரியம்மன் கோயிலை இடித்து அகற்றியவா்கள் மீது நடவடிக்கை எடுக்க வலியுறுத்தி போராட்டத்தில் ஈடுபட்டனா். மேலும் நடவடிக்கை எடுக்க வில்லையென்றால் தங்களது ஆதாா் மற்றும் குடும்ப அட்டைகளை ஒப்படைக்க போவதாக கூறினா். அங்கிருந்த போலீஸாா் பொதுமக்களிடம் பேச்சு நடத்தியதையடுத்து போராட்டத்தை கைவிட்டனா்.

பின்னா் அவா்கள் இது தொடா்பான புகாா் மனுவையும் ஆட்சியா் மு.பிரதாப்பிடம் அளித்தனா். மனுவை பெற்றுக்கொண்ட அவா் தக்க நடவடிக்கை எடுப்பதாக தெரிவித்தாா்.