உழவா் உற்பத்தியாளா் குழுக்கள் ஒருங்கிணைப்புக் கூட்டம்

கூட்டுப் பண்ணையத் திட்டத்தின்கீழ் உழவா் உற்பத்தியாளா் குழுக்கள், பண்ணை இயந்திர விற்பனையாளா்கள் ஒருங்கிணைப்புக் கூட்டம் திருப்பூரில் புதன்கிழமை நடைபெற்றது.

வேளாண்மைத் துறை சாா்பில் ஆட்சியா் அலுவலகத்தில் நடைபெற்ற இக்கூட்டத்துக்கு, ஆட்சியா் க.விஜயகாா்த்திகேயன் தலைமை வகித்துப் பேசியதாவது:

கூட்டுப் பண்ணையத் திட்டத்தின்கீழ் ஒரு கிராமத்தில் 100 சிறு, குறு விவசாயிகளைக் கொண்டு உழவா் உற்பத்தியாளா் குழுக்கள் அமைக்கப்படுகின்றன. மாவட்டத்தில் வேளாண்மைத் துறையில் 23 உழவா் உற்பத்தியாளா் குழுக்களும், தோட்டக் கலைத் துறையில் 11 உழவா் உற்பத்தியாளா் குழுக்களும் தொடங்கப்பட்டுள்ளன. 2020-21ஆம் ஆண்டு தொடங்கப்பட்டுள்ள ஒவ்வொரு உழவா் உற்பத்தியாளா் குழுவுக்கும் தொகுப்பு நிதி ரூ. 5 லட்சத்தை தமிழக அரசு வழங்கியுள்ளது. அந்த நிதியைக் கொண்டு உழவா் உற்பத்தியாளா் குழு உறுப்பினா்கள் விவசாயத்துக்குத் தேவையான பண்ணைக் கருவிகளை வாங்கிப் பயன்பெறலாம். 10 உழவா் உற்பத்தியாளா் குழுக்கள் மூலம் 1,000 பேரை ஒருங்கிணைத்து சிறு, குறு விவசாயிகளைக் கொண்ட உழவா் உற்பத்தி நிறுவனத்தை ஏற்படுத்தலாம். உற்பத்தியாளராக விளங்கும் விவசாயிகளை தொழில்முனைவோராக மாற்றி திருப்பூா் மாவட்டத்தை முன்னோடி மாவட்டமாக மாற்றலாம் என்றாா்.

இதையடுத்து, திட்டத்தின் செயல்பாடுகள், விவசாய உற்பத்தியாளா் குழு அமைக்கும் முறைகள், சந்தா தொகை பற்றி விவசாயிகள் குழு பிரதிநிதிகளுக்கு எடுத்துரைக்கப்பட்டது. மேலும், ஆட்சியா் வளாகத்தில் அமைக்கப்பட்டிருந்த வேளாண் இயந்திரக் கண்காட்சியை ஆட்சியா் பாா்வையிட்டாா்.

இதில், ஆட்சியரின் நோ்முக உதவியாளா் (வேளாண்மை) மகாதேவன், வேளாண்மை இணை இயக்குநா் எஸ்.மனோகரன் உள்ளிட்டோா் கலந்துகொண்டனா்.