தங்கப் பத்திர விற்பனை வரும் திங்கள்கிழமை (ஜூலை 12) தொடங்கவுள்ள நிலையில், அதன் விலையை கிராமுக்கு ரூ.4,807-ஆக நிா்ணயித்துள்ளதுள்ளதாக ரிசா்வ் வங்கி தெரிவித்துள்ளது.
இதுகுறித்து ரிசா்வ் வங்கி மேலும் கூறியுள்ளதாவது:
3 தின சராசரி விலை: நடப்பு 2021-22-ஆம் நிதியாண்டுக்கான நான்காம் கட்ட தங்கப் பத்திர விற்பனை ஜூலை 12-ஆம் தேதி தொடங்கி ஜூலை 16-ஆம் தேதி வரை 5 நாள்கள் நடைபெறவுள்ளது. இந்த கட்டத்தில் வெளியிடப்படும் 999 சுத்த தன்மை கொண்ட தங்கப்பத்திரத்தின் விலை கிராமொன்றுக்கு ரூ.4,807-ஆக நிா்ணயம் செய்யப்பட்டுள்ளது. வெளியீட்டுக்கு முந்தைய மூன்று வா்த்தக தின சராசரி விலையினை அடிப்படையாகக் கொண்டு தங்கப் பத்திரங்களுக்கான விலை நிா்ணயம் செய்யப்பட்டுள்ளது.
ரூ.50 தள்ளுபடி: அரசுடன் ரிசா்வ் வங்கி நடத்திய ஆலோசனையின் அடிப்படையில், தங்கப் பத்திரங்களை வாங்க ஆன்லைனில் விண்ணப்பித்து டிஜிட்டல் முறையில் பணம் செலுத்துவோருக்கு கிராமுக்கு ரூ.50 தள்ளுபடி வழங்குவதென முடிவு செய்யப்பட்டுள்ளது. அத்தகைய முதலீட்டாளா்களுக்கு ஒரு கிராம் தங்கப் பத்திரத்தின் விலை ரூ.4,757-ஆக இருக்கும் என ரிசா்வ் வங்கி கூறியுள்ளது.
முதலீட்டு அளவு: நடப்பாண்டு மே 31 முதல் ஜூன் 4 தேதி வரையில் நடைபெற்ற மூன்றாம் கட்ட தங்கப்பத்திர விற்பனையில் கிராம் ரூ.4,889-ஆக நிா்ணயிக்கப்பட்டிருந்தது.தற்போது வெளியிடப்படவுள்ள தங்கப்பத்திரங்களில் தனிநபா் ஒருவா் குறைந்தபட்சம் 1 கிராம் முதல் அதிகபட்சம் 4 கிலோ வரை முதலீடு செய்ய முடியும்.
அஞ்சல் அலுவலகங்கள், வங்கிகள், பங்குச் சந்தைகள் மூலமாக தங்கப்பத்திரங்கள் முதலீட்டாளா்களுக்கு விற்பனை செய்யப்படவுள்ளன.
6 கட்ட தங்கப்பத்திர விற்பனை: 2021 மே மாதத்திலிருந்து 2021 செப்டம்பா் வரையிலான காலகட்டத்தில் ஆறு கட்டங்களாக தங்கப் பத்திர விற்பனையை மேற்கொள்ள மத்திய அரசு முடிவு செய்துள்ளது. இந்த தங்கப் பத்திரங்களை மத்திய அரசின் சாா்பில் ரிசா்வ் வங்கி வெளியிடுகிறது.
சேமிப்பை ஊக்குவிக்கும் நோக்கம்: நேரடியாக தங்கம் வாங்கும் போக்கை குறைத்து சேமிப்பை ஊக்குவிக்கும் நோக்கில் கடந்த 2015-ஆம் ஆண்டு நவம்பரில் தங்கப் பத்திரம் திட்டத்தை மத்திய அரசு தொடக்கி வைத்தது. இந்த திட்டம் தொடங்கி 2021 மாா்ச் இறுதி வரையிலுமாக தங்கப் பத்திர விற்பனையின் மூலமாக ரூ.25,702 கோடி திரட்டப்பட்டுள்ளது.
கடந்த 2020-21-ஆம் நிதியாண்டில் ரிசா்வ் வங்கி 12 கட்டங்களாக தங்கப் பத்திரங்களை வெளியிட்டது. இதன் மதிப்பு ரூ.16,049 கோடியாகும் (32.35 டன்).
கோட்ஸ்:
தங்கப்பத்திரங்களை வாங்க ஆன்லைனில் விண்ணப்பித்து டிஜிட்டல் முறையில் பணம் செலுத்துவோருக்கு கிராமுக்கு ரூ.50 தள்ளுபடி வழங்க முடிவு செய்யப்பட்டுள்ளது. அத்தகைய முதலீட்டாளா்களுக்கு ஒரு கிராம் தங்கப்பத்திரம் ரூ.4,757 என்ற விலையில் விற்பனை செய்யப்படும்.