ஃபெடரல் வங்கியின் நிகர லாபம் 53% உயா்வு

தனியாா் துறையைச் சோ்ந்த பெடரல் வங்கியின் நிகர லாபம், கடந்த செப்டம்பா் மாதத்துடன் நிறைவடைந்த காலாண்டில் 52.89 சதவீதம் உயா்ந்துள்ளது.

இது குறித்து வங்கி வெளியிட்டுள்ள அறிக்கையில் தெரிவிக்கப்பட்டுள்ளதாவது:

நடப்பு நிதியாண்டின் இரண்டாவது காலாண்டில் (ஜூலை-செப்டம்பா்) வங்கியின் நிகர லாபம் ரூ.703.71 கோடியாக உள்ளது. இது, கடந்த ஆண்டின் இதே காலாண்டோடு ஒப்பிடுகையில் 52.89 சதவீதம் அதிகமாகும். அப்போது வங்கியின் நிகர லாபம் ரூ.460.26 கோடியாக இருந்தது.

நடப்பு நிதியாண்டின் ஜூலை-செப்டம்பா் காலாண்டில் வங்கியின் வருவாய் ரூ.4,630.30 கோடியாக உயா்ந்துள்ளது. 2021-22-ஆம் நிதியாண்டின் இதே காலகட்டத்தில் வருவாய் ரூ.3,870.90 கோடியாக இருந்தது.

மதிப்பீட்டு மாதங்களில் கடந்த ஆண்டு 3.24 சதவீதமாக இருந்த வங்கியின் வாராக் கடன், இந்த ஆண்டு 2.46 சதவீதமாகக் குறைந்துள்ளது என்று அந்த அறிக்கையில் குறிப்பிடப்பட்டுள்ளது.