தனிமையோடு பேசுங்கள்: இராச. கிருட்டினன்

மெல்லப் பேசுங்கள் - உண்மை 
சொல்லிப் பேசுங்கள்!  
தனிமை யோடே இனிமை யுடனே
கனிவாய்ப் பேசுங்கள்!

நன்றாய்ப் பேசுங்கள் - தவறா
தென்றும் பேசுங்கள்! 
தன்னைத் தானே என்றும் அறிய
ஒன்றிப் பேசுங்கள்!

நிறையப் பேசுங்கள்  - பாரம்
குறையப் பேசுங்கள்! 
ஒளிவோ மறைவோ சற்றும் இன்றித்
தெளிவாய்ப் பேசுங்கள்!

மாயக் கண்ணாடி -  மனமோர்
தூய கண்ணாடி !
வலத்தை இடத்தை மாற்றாக் குழப்பம்
விலக்கும் கண்ணாடி !

குற்றம் கண்டிடலாம் - நிறைகள்
பற்றிக் கண்டிடலாம்!
உண்மை தன்னை உரிய வகையில் 
கண்ணாற் கண்டிடலாம் !

தன்னை அறிந்திடலாம் - பொறுமை
இன்மை அறிந்திடலாம்! 
சித்தம் புத்தி அகங்கா ரத்தின்
வித்தை அறிந்திடலாம்!

உற்றுக் கேளுங்கள் - எதையும்
பற்றாய்க் கேளுங்கள்! 
மனத்தின் கூற்றை கவனத் தோடே
தினமும் கேளுங்கள்!

இனிக்கும் தருணங்கள் - கண்கள் 
பனிக்கும் தருணங்கள்! 
தனிமை தானே தனக்குள் பேசக்
கனிந்த தருணங்கள்!